Inspeksyon na sab sa baha?

Dili na gyud kalikayan nga sa matag bunok sa uwan, ang atong mga kadalanan diri sa Sugbo ug silingang dakbayan magpabilin nga M/V Baha! Mao nga usa ka maayong lakang ug dakong kalamboan ang gihimong inspeksyon ni DPWH Secretary Vince Dizon bag-ohay lang subay sa "Oplan Kontra Baha" sa gobyerno.

Una niyang gisusi ang gihimong drainage project sa Barangay Kinasang-an, dakbayan sa Sugbo. Giabi-abi siya sa mga opisyal gikan sa Kinasang-an ug Basak Pardo—duha ka dapit nga permi lang mag-antus basta gani gani mokusog ang uwan. Didto, gihikyad gyud sa DPWH ang ilang Drainage Master Plan aron matan-aw kon asa dapit ang bara ug unsa nga mga imprastraktura ang kinahanglang usabon aron masulbad na kining problemaha.

Human niini, mideretso dayon ang Kalihim sa Subangdako, Mandaue City diin gitan-aw usab ang kahimtang sa Sapa sa Uril nga sumpay sa Mahiga Creek. Kauban ni Dizon sila si Gov. Pam Baricuatro, Mayor Jonkie Ouano, ug Congresswoman Lollipops Ouano-Dizon.

Mismong si Sec. Dizon nagkanayon nga kabahin kini sa dinalian nga mando sa Presidente aron masiguro nga matagag gidukdukan ug paspas nga aksyon ang problema sa pagbaha. Naningkamot man ang Mandaue ug nakita sab ang ilang dakong improvement sa ilang mga programa sa baha, apan kinahanglan gyud ang suporta sa nasyonal aron mag-abot ang mga solusyon.

Apan gawas sa inspeksyon sa kadalanan ug sapa, wala usab makalikay si Sec. Dizon sa mga init nga isyu nga gipangutana kaniya.

Sama na lang sa gitaho ni Ombudsman Remulla bahin sa kontrobersyal nga ?60-billion flood control project alang sa Sugbo, diin gihatagan kini’g katin-awan sa kalihim. Lakip usab sa iyang gitubag mao ang alegasyon sa gitawag nga "ghost project" didto sa lungsod sa Balamban nga matud niya huwaton nalang ang sunod nga lakang sa Ombudsman.

Ang labing importante karon, gawas sa politika ug pasangil, mao nga makita sa katawhan nga adunay agi ug adunay kasulbaran.

Ang baha walay gipili—datu man o kabus, pultahan sa balay o negosyo, sudlan gyud basta magpalabi ang tubig.

Pahinumdum lang nato sa DPWH ug sa atong mga lokal nga opisyal: unta dili lang kini matapos sa inspeksyon ug mga press release. Kinahanglan nga matuman ug mahuman ang mga proyekto sa saktong oras ug nga walay nakaw o substandard nga trabaho. Kay kon magpadayon ang subida sa tubig, ang katawhan gihapon ang mag-antus ug malumos sa baha.