Panghinaot

Sigun ni Ombudsman Boying Remulla mokabat na sa P60 bilyones ang pundo nga gigahin alang sa flood control dinhi sa Sugbo sulod sa milabay’ng unom ka tuig. Sa ka dako sa maong kantidad nganong  hangtod ron nagpabilin gihapon ang problema sa baha?

Inay dunay alibyo mas nisamot man hinuon ang problema sa pagbaha dinhi sa Sugbo. Hain man paingon ang maong pundo nganong wala man masulbad ang problema?

Lisod ang modiritso og pamasangil nga gibulsa sa mga opisyal sa kagamhanan ang maong pundo apan wala magkinahanglan og “rocket science” aron masabtan ang sitwasyon. Kun dunay dakong pundo alang sa flood control projects pero misamot hinuon ang problema sa baha usa ray ipasabot niini---wala magamit sa husto ang kwarta.

Kun giunsa paggasto ang pundo mao ni susihon sa buhatan sa Ombudsman. Sigun ni Remulla, ilang imbistigahon ang tanang flood control projects sa Sugbo. Gani atol sa iyang pagbisita sa Sugbo niadtong miaging adlaw gisugdan nan i Remulla pagsusi ang pipila ka mga proyekto.

Lakip sa ilang tan-awon tinuod ba nga gitukod ang proyekto ug gisunod ba ang plano labi pa sa gidak-on sa mga kabilya ug gibag-on sa materyales.

Alang sa mga magbubuhis nga apektado sa kanunay’ng pagbaha dinhi sa Sugbo daw mananoy nga awit ang ilang nadungog gikan sa Ombudsman tungod kay dugay na nga nangayo og hustisya ang mga biktima labi pa niadtong kang kansang mga mahal sa kinabuhi gianod atol sa Bagyong Tino.

Ang makita nga dunay mga opisyal nga manubag sa kapakyas pagsulbad sa baha bisan sa kadako na sa pundo nga gigahin tingali makahupay sa dughan sa mga nagbangutang pamilya sa mga biktima sa baha.

Duna lang koy pipila ka mga panghinaot, nga unta seryoso si Ombudsman Remulla sa ilang imbistigasyon.  Ug hinaot nga molahutay ang imbistigasyon hangtod mahuman og dunay manubag ug dili lang kutob sa pagpahumot aron pagduso sa mga politikanhong tumong.

Labaw sa tanan, hinaot nga wala gamita sa Ombudsman iyang gahom aron gukdon ug paludhon ang mga opisyal nga wala mosubay sa kabubot-on sa mga gamhanan.