EDITORYAL — AI nindot, pero kuyaw

Daghan na kaayo ang makamaong mogamit anang mga artificial intelligence nga mga kahimanan sa internet ilabi na sa social media. Lingaw kaayo ang uban kay nindot pagkahimo ug katuohan ang ilang mga nabuhat ug gipang-post.

Apil na ana ang paggamit sa mga nawong sa tawo ug gibalhin ngadto sa laing lawas nga dili gyud mabantayang dili diay tinuo. Kaning mga applications nga gigamit ani dali ra kaayong makat-unan paggamit.

Gituyo ni sa mga naghimo sa mga apps nga dili kinahanglang gradwado og computer science o computer engineering aron makagamit sa ilang apps, gipasayon gyud tanan sa tuyo nga daghang mo-subscribe sa ilang produkto.

Tiaw mo nang hulagway puyde ng buhatong video ug makabuhat na og mga senaryo o salida gamit ang tawong gustong maoy himuong aktor o sentro sa video.

Pero, sa kamot sa mga dautang tawo, peligro kaayo ni nga skills. Puyde niining gub-on ang pagkatawo sa uban pinaagi sa paggamit sa ilang mga dagway.

Gani sa  bag-o pa gasugod ang away tali nilang  Presidente Ferdinand Marcos Jr.  ug Bise Presidente Sara Duterte, daghang mga nanggawas nga mga videos nga nagpakita sa dagway sa presidente nga dunay mga dautang gipangbuhat.

Nikatap kini sa social media nga niresulta sa klase-klaseng mga pagtamay batok sa presidente gikan sa mga kritiko niyang netizens. Kusganon kining tanan gihimakak sa Palasyo ug dunay gilusad nga imbestigasyon bahin ani.

Kay matud pa sa ahensiya, ubos sa Republic Act No. 10173 or the Data Privacy Act of 2012 ang dagway o pamayhon sa usa ka tawo usa ka personal information ug dili ni puyde nga basta-basta lang gamiton sa uban kun walay pagtugot sa tag-iya.

Ilabi na kun ang video o hulagway diin gigamit ang dagway o pamayhon nagpakita og mga buhat nga dili tinuod niyang gibuhat o niestorya og mga pulong nga wala niya gisulti.