Angayan respetohon ang korte

Nakatilaw og kasaba gikan ni Sandiganbayan Presiding Justice Geraldine Econg si Tarlac 3rd District Rep. Noel Rivera tungod sa pagtambong niini sa iyang hearing nga nagsulo-ob lang og t-shirt ug maong nga karsones.  Alang kang Justice Econg, ang binistihan sa congressman, nagpasabot sa ka-walay respeto niya sa korte.  Strikto ang dress code sa Sandiganbayan busa dili angay yama-yamaan.  Apan sa kahimtang ni Congressman Rivera nga nag-atubang og kaso nga pagpangawkaw, makaingon kita nga “Ang pagka-disente wala sa biste kon dili anaa lang sa nagsul-ob niini.”  Muleeng!

Dili mag-ilogay sa kredito

Gisalindot sa Malacañang ang pangangkon ni Bise Presidente Sara Duterte nga ang People’s Ville housing project sa Davao City nasugdan sa termino sa naulahi isip mayor.  Mipresentar ang Malacañang og mga permits og registration documents nga giingon’g gi-isyu gikan sa tuig 2023 ngadto sa 2024.  Malampuson tingale ang maong proyekto kay nag-ilogay man sila’g angkon sa kredito niini.   Dili na lang unta mag-ilogay aron motunhay kay ginaingon baya nga nga, “Walay kinutuban ang mahimong kaayohan kon dili nato igsapayan kon kinsa ang makadawat sa kredito sa maayong buhat.”  Mao maan!

Kompleto na kon biyaan

Nanawagan si Senador Bam Aquino alang sa transparency sa disbursement sa pundo sa flood control sa kagamhanan human sa nahitabong pagbaha sa nagkalain-laing bahin sa Luzon tungod sa bagyo’ng Luis ug Maymay ingon man sa hangin’g habagat.  Dili kaha angay resolbahon ug tiwason una ang imbestigasyon sa mga anomaliya sa flood control projects sa miagi’ng mga tuig nga hangtud karon wala pa masulbad?  Morag haum kaayo ang panahom nga, “Kompleto na ang gimbuhaton kon kini biyaan, dili kay kon kini mahuman.”  Madahaan!

Mag-aginod ang sistema

Sa ikaduhang higayon, gi-akusar na usab ni Cebu City Vice Mayor Tomas Osmeña si Mayor Nestor Archival nga nag-play safe sa iyang pagdumala sa development priorities sa dakbayan taliwala sa problema sa trapiko nga giingon nga na-trigger sa Oplan Bantal.  Dugang pa ni Osmena, gipalabon ni Archival ang interest sa mga adunahan kay sa katawhan. Niining pagpunay’g panaway ni Osmeña kang Archival, dili ba kaha masi-ak sa kadugayan ang ilang panagkauban?  Kay ginaingon baya nga, “Kon ang Partido magpunay og bingkil, ang tibuok sistema mag-aginod gayod sa iyang pag-uswag.”  Fezteleern!

Napunit bisan wala gipanamkon

Aron masulbad ang suliran sa basura sa Cebu City, gisugyot sa Department of Public Services (DPS) nga gamiton una ang Block 27 sa Barangay Mabolo isip usa ka temporaryo’ng garbage transfer site.    Dili bag-o ang maong ideya sa paggamit sa Block 27 isip transfer site sa basura kay gilaraw man usab kini sa mga nangagi’ng administrasyon.  Susama ra ang kahimtang sa Block 27 sa Pond A sa SRP nga gipahunong sa DENR busa kuli usab nga mahatagan og permit ang Block 27 alang sa maong katuyoan.  Matud pa sa usa ka observer, “Ang maong ideya sa DPS, wala pa gani ipanamkon, napunit na.” Pagkatoytoy!