Guo, pwedeng gawing state witness - PAOCC

Kung ituturo ‘utak’ ng POGO

MANILA, Philippines — Posibleng gawing “state witness” ng Presidential Anti-Organized Crime Commission (PAOCC) si suspended Bamban, Tarlac Mayor Alice Guo kung ituturo nito ang mastermind o “utak” sa operasyon ng illegal na Philippine Offshore Gaming Operators (POGOs).

“We wouldn’t be open to that discussion unless we get higher on the food chain in relation to the crime that this group has committed,” ani PAOCC spokesperson Winston Casio.

Sa ginanap na Saturday News Forum, sinabi ni Casio na maaari namang pag-aralan ang paglalagay kay Guo bilang state witness kung may sapat na basehan.

“If she appears to be the least guilty and she will be able to point at other principals higher than her, why not?” ani Casio.

Subalit ayon kay Casio si Guo ay hindi maituturing na “least guilty” ang mga sangkot sa ilegal POGOs. Aniya, ang prosecutor din ang siyang mag-e-evaluate kung dapat na gawing state witness si Guo at hindi ang PAOCC.

Hindi naman pabor si Senator Sherwin Gatchalian na gawing state witness si Guo at sa halip, nais nitong isiwalat ng suspendidong alkalde ang kanyang nalalaman upang mabawasan ang bigat ng kanyang kaso.

Nahaharap si Guo sa kasong qualified trafficking na non-bailable offense sa Department of Justice.