Ganti (10)
“TIYAK na buntis ka, Lorena,” sabi raw ni Aling Delia. Hinimas-himas ang likod ni Lorena na nagsusuka sa lababo. Malamig ang pawis.
“Ano po ang gagawin ko Aling Delia?”
“Ipatse-checkup kita pare masiguro. Mamaya punta tayo sa ospital. Sige magpahinga ka muna. Ako na muna ang maghuhugas ng pinggan.”
“Salamat po Aling Delia.”
Positibo ang resulta ng pregnancy test.
“Sabi ko na nga ba,” sabi ni Aling Delia.
“Paano po ako ngayon, Aling Delia?” tanong ni Lorena nang palabas na sila sa clinic ng OB-Gyne.
“Aba e alangan namang itapon ka namin ni Erning. Ngayon pa na buntis ka. Huwag kang mag-alala at kasama mo kami kahit saan.”
“Paano ko po bubuhayin ang anak ko, Aling Delia?”
“Kami nga ang bahala ni Erning. Basta huwag kang mag-isip tungkol doon.”
Nang malaman ni Mang Erning na buntis si Lorena ay pinagpaliwanagan din ito. Binanggit kasi ni Aling Delia sa asawa na naguguluhan ito sa kalagayang buntis. Parang hindi kakayanin ang bagong pagsubok.
“Huwag kang matakot kung paano bubuhayin ang anak mo. Basta manalig ka lang sa Diyos. Nalampasan mo na yung pinakamabigat na trahedya e di kaya mo rin yan. Dito tayo magsasama-sama.”
Umiyak si Lorena.
“Ikaw din naman ang nagsabi na wala kang ibang mapupuntahan. Dito e hindi ka namin ituturing na katulong o alila, basta magkakasama tayo rito. Kung ano ang kakainin namin, kakainin mo rin,” sabi pa ni Mang Erning.
Lalong umiyak si Lorena. Napakabuti ng mag-asawa. Hiling niya na sana ay humaba pa ang buhay ng mag-asawa.
Habang lumalaki ang tiyan ni Lorena ay ang mag-asawang Erning at Delia ang sabik na sabik.
“Sana lalaki para mayron akong makalaro,” sabi ni Mang Erning.
“Sana babae para meron akong aayusan,” sabi naman ni Aling Delia.
At saka magtatawanan.
“Ikaw Lorena, ano ang gusto mo, babae o lalaki?” tanong ni Mang Erning.
“Kahit po ano.”
Sa totoo lang ay hindi pa rin matanggap ni Lorena na ang pinagbubuntis ay mula sa among Intsik na gumahasa sa kanya. Naaalala niya ang ilang beses na panggagahasa sa kanya ng amo.
Hanggang sa manganak si Lorena. Isang malusog na sanggol na lalaki ang ipinanganak niya.
(Itutuloy)
- Latest
- Trending
