Cebu Marathon 2025 nahakot og rekord nga partisipante
CEBU, Philippines — Usa ka kasaysayan ang seguradong masuwat sa Cebu sports gumikan kay ang gikahinaman nga AIA Cebu Marathon 2025 nga ipahigayon karong Domingo, Enero 12, diha sa SM Seaside City agi sa Cebu–Cordova Link Expressway (CCLEX) nakahakot og rekord nga gidaghanon sa mga partisipante.
Sa kinatibuk-an, 12,275 ka runners gikan sa kapin sa 40 ka mga nasud sa tibuok kalibutan ang mopakita'g aksiyon sa usa sa labing dako ug labing bongga nga marathon sa Pilipinas diin ang 3, 127 ang mokumbati sa makutas nga 42 ka kilometro nga rota.
Ang 25K category maoy labing daghan og entrante nga miabot ngadto sa 6, 165.
Ang 12K adunay 2,090 ka managanay, samtang 893 ang mosalmot sa 6K.
Mao kini ang labing daghang partisipante sukad sa pagkahimusgo ning tinuig nga kalihukan niadtong 2008 diin gilabwan niini ang 8,800 ka buok nga miapil sa miaging edisyon.
"These are record numbers and some of the biggest numbers of any marathon in the country," matud pa ni John Pages sa Cebu Executive Runners Club (CERC).
Sa laing bahin, ang race expo ug ang pagkuha sa race kit magpadayon karong adlawa (Biyernes, Enero 10) gikan sa alas-10 sa buntag ngadto sa alas-9 sa gabii ug mahuman kini karong Sabado, Enero 11, gikan sa alas-8 sa buntag hangtud sa alas-9 sa gabii diha sa Mountain Wing sa SM Seaside.
Ang gun start gitakda sa alas 12:30 sa buntag sa adlaw sa lumba. Kadtong modagan sa 42K gihatag og walo ka oras nga cutoff time.
Makadani nga ganting salapi ang iapud-apud sa mga mananaog.
Ang makampiyon sa 42K mobulsa og P40,000, samtang ang mopahiluna sa ikaduha ngadto sa ikalimang dapit mokubra og P20,000, P15,000, P10,000 ug P7,500.
Ang Top 5 mokabi og P20,000, P10,000, P7,500, P5,000 ug P3,000 sa 25K, P10,000, P8,000, P5,000, P3,000 ug P2,000 sa 12K ug P5,000, P4,000, P3,000, P2,000 ug P1,000 sa 6K.
- Latest
