Giannis, Lillard miagak sa Bucks batok Raptors

CEBU, Philippines — Si Giannis Antetokounmpo mireshistro sa ikaupat niyang triple-double ning season samtang si Damian Lillard mi-iskor og 25 puntos aron pangulohan ang Milwaukee Bucks ngadto sa 128-104 nga paglampaso sa Toronto Raptors sa NBA kagahapon didto sa Scotiabank Arena sa Toronto, Canada.

Ang nabantog nga "Greek Freak" miharos og 11 puntos, 12 ka rebounds, ug 13 ka assists aron tabangan ang Bucks pagpakgang sa duha ka sagunson nilang pilde.

Didto sa Chicago, si Zach LaVine mipupo og 35 puntos, 10 ka rebounds, ug walo ka assists sa dihang ang Bulls mi-rally human malubong og 19 puntos sa ikatulong kuwarter aron patikalbongon ang San Antonio Spurs, 114-110.

Midugang si Coby White og 23 puntos, apil na ang kruysal niyang layup ug dunk nga nakapaginhawa sa Bulls, 113-110, sa pinal nga 15.9 segundos. Ang free-throw ni LaVine maoy nagtuldok sa impresibo nilang pagbalitok.

Ang Bulls nakasugakod sa laing mangtas nga performance ni Victor Wembanyama, nga mikolekta og 23 puntos, 14 ka rebounds, upat ka assists ug walo ka blocks alang sa pilderong Spurs. Didto sa Detroit, si Cade Cunningham mipaulbo og 32 puntos ug siyam ka assists sa dihang ang Pistons madasigong mipapas sa 22 puntos nilang alkansi aron tumbahon ang Portland Trail Blazers, 118-115.

Si Tim Hardaway Jr. mibubo og 11 sa iyang 26 puntos sa katapusang kuwarter alang sa Pistons.

Sa laing bahin, si Bradley Beal mikadlit og 25 puntos aron pangulohan ang Phoenix Suns ngadto sa 109-99 nga pagpayaka sa Philadelphia 76ers, samtang si Cole Anthony mitali og 24 puntos sa dihang gibihag sa Orlando Magic ang New York Knicks, 103-94.

Sa Memphis, si Jaren Jackson mipatuasik og 35 puntos ug 13 ka rebounds aron ituboy ang Grizzlies ngafto sa 119-104 nga pagbugha sa Dallas Mavericks, nga misukarap sa ikalimang sagunson nga higayon kay wala ang duha nila ka mga bitoon nga sila si Luka Doncic ug Kyrie Irving.

Ang Minnesota Timberwolves, nga gigatongan sa 37 puntos ni Anthony Edwards, miputol sa tulo ka sunod-sunod nilang malas human gipiog ang Los Angeles Clippers,108-106.