Ginebra, Meralco gisubhan ang bag-ong tuig og kadaogan

CEBU, Philippines — Giablihan sa Barangay Ginebra Kings ug Meralco Bolts ang bag-ong tuig pinaagi sa usa ka masipang buto.

Ang Ginebra milampornas sa San Miguel Beer, 93-81, atol sa pagbalik sa aksiyon sa PBA Commissioner's Cup didto sa Smart Araneta Coliseum niadtong Domingo sa gabii.

Si Troy Rosario ang bida sa Gin Kings human mipabuto og 22 puntos uban ang 10 ka rebounds ug usa ka block.

Bisan og nayayay, si Justin Brownlee nakamaneho pagpugnit og 19 puntos, pito ka rebounds, duha ka assists, tulo ka blocks ug usa ka steal alang sa Ginebra nga dominante kaayo ug sa usa ka higayon miabante og 20 puntos.

Sila si Stephen Holt, Japeth Aguilar, Scottie Thompson, RJ Abarrientos ug Maverick Ahanmisi mihimo sab og kasikas sa dihang giinat sa Kings ang ilang rekord ngadto sa 5-2.

Si Holt mihipos og 15 puntos, si Aguilar mi-iskor og 11 uban ang walo ka rebounds ug lima ka assists, samtang sila si Thompson ug Abarrientos mitali og otso puntos matag usa.

Ang Beermen natagak sa 3-4 ug wa pay daog sud sa duha ka duwa sukad sa pag-abot sa bag-o nilang import nga si Babari Narcis.

Sa sayo pa, ang Meralco mibihag sa Eastern, 88-83.

Si Akil Mitchell miharos og 31 puntos alang sa Meralco, nga nagbitbit na karon og 4-2 nga baraha.

Si Chris McLaughlin mipupo og 28 puntos, 18 ka rebounds ug upat ka blocks apan wala mosaler ang maanindot niyang salida gumikan kay ang Eastern nakatilaw sa ikatulo nilang pilde sa siyam ka duwa.