NorthPort magsagubang og malisud nga hagit vs Ginebra
CEBU, Philippines — Ang NorthPort moduwa sa unang higayon sud sa 19 ka adlaw karong adlawa (Miyerkules, Enero 8) diin ilang protektahan ang ilang pagkupot sa solong liderato batok sa miratsadang Barangay Ginebra sa usa ka eksplosibong sangka didto sa PhilSports Arena sa Pasig City.
Mosikad ang ilang kumbati sa alas 7:30 sa gabii.
Alang ni Kadeem Jack ug sa iyang mga kaubanan, mao kini ang sinugdanan sa sunod-sunod nilang malisud nga tahas sa PBA Commissioner's Cup diin ilang banggaon ang Gin Kings, Meralco Bolts, Rain or Shine Elasto Painters ug dayon ang San Miguel Beermen.
Sa kasamtangan, ang NorthPort maoy nag-una sa standings bitbit ang 6-1 win-loss record. Ilang natilawan ang bugtong nilang pilde sa mga kamot sa Phoenix Super LPG Fuel Masters.
Sa miagi nilang pagtikang sa korte, ang Batang Pier mipayaka sa Hong Kong Eastern, 120-113, ubos sa pagpangu nilang Jack ug Arvin Tolentino nga nagkumboya og 73 puntos.
Sila si Joshua Munzon, Will Navarro, Fran Yu, Evan Nelle ug Sidney Onwubere mihimo sab og kasikas uban sa Batang Pier hinungdan sa impresibo nilang sinugdanan nga lagmit magtukmod kanila ngadto sa makasaysayanong pagsud sa playoffs.
Miangkon hinoon si coach Bonnie Tan nga taas pa ang ilang lakwan. Masukod ang katakos sa NorthPort sa dihang ilang harongon ang Gin Kings sa una nilang duwa ning bag-ong tuig.
Bug-at nga tahas ang pas-anon sa NorthPort batok sa Ginebra, nga nagtangag og 5-2 nga baraha human miposte og duha ka sagunson nga daog batok sa Magnolia ug San Miguel Beer.
- Latest
