“Sugbo Baboyan” ilusad sa probinsiya sa Sugbo sunod buwan

CEBU, Philippines — Gikatakdang ilusad sa Probinsiya sa Sugbo ang bag-ong programa niini nga “Sugbo Baboyan sa Limpyo ug Hapsay nga Tugkaran” sunod bulan.

Subay niini aron nga daghan ang makaapil sa maong programa, nagplano ang Kapitolyo nga mohatag og ganti kun diin ang mga top-performing nga LGUs, barangays, puroks, ug panimalay makadawat og prempyo.

Ang Sugbo Baboyan usa ka programa nga nag promote og sustainable ug organic nga pagbuhi sa baboy diin ang mga baboy dili lawgan og commercial feeds kon dili organic lang nga materyales o pagkaon.

Ang mga binuhing baboy kinahanglan sab nga anaa sa limpyo nga palibot.

Sumala sa Kapitolyo ang maong inisyatiba gipaabot nga mopalambo dili lang sa kalimpyo sa palibot apil na usab ang pagsuporta sa lokal nga industriya sa lechonan sa Sugbo pinaagi sa pagpasaka sa suplay sa native hogs o baboy.

Si Cebu Governor Gwendolyn Garcia atol sa iyang tigum sa mga mayor niadtong Mayo 23 nagkanayon nga dako ang matabang sa maong programa sa pagpromote sa lechon industry sa Sugbo ingon man sa organic nga pagbuhi sa baboy.

Daku nga nga makabenipisyo niini ang mga trabahante sa maong industriya, pagkunhod sa presyo sa baboy ug makatabang sa status sa Probinsya isip Lechon Capital sa nasud. — /MEL (BANAT NEWS)