Langayng imbestigasyon
Gidasonan sa kinaiyahan ang dugay nang awhag sa mga Sugbuanon, nga giisnab sa nasudnong gobyerno, pag-imbestigar sa labing daling panahon sa gidudahang ghost ug substandard projects dinhi. Bagyong Tino nibusdak og labing sipa nga mensahe nga dili mahimong lingiwan sa Malacañang.
Nisugo si Presidente Ferdinand Marcos Jr. nga imbestigahon nganong napakyas ang ?26 bilyones nga balor sa flood-control projects pagpanalipod sa mga Sugbuanon gikan sa baha. Gideklarar nang Department of Public Works and Highways (DPWH) Secretary Vince Dizon nga pataka ang mga proyekto ug angayng patubagon ang mga responsable.
-o0o-
Usa sa nakitang buslot ni Dizon mao nga usik-usik ang paghimo og riprap sa ubos sa Mananga River kay mas epektibo unta ang pagtukod og dams sa ibabaw nga makapugong sa bul-og sa suba ug dili na makahulga paglumos sa mga nagpuyo sa kabarangayan sa patag.
Pasiunang nahibaw-an sa Office of the President nga ang ?1.9 bilyones nga Mananga flood control projects gi-chop-chop ngadto sa 16 ka segments (aron makontrolar ang subasta sa 1st District Engineering Office) ug, nakatag-an ka, ang tanang 16 ka kontrata nadaog sa QM Builders.
-o0o-
Kinsa may patubagon ni Dizon sa bangis nga trahedya sa Mananga nga nibanlas sa kabalayan ug nikalas sa inosenteng mga kinabuhi? Segurong mapaninglan ang kontraktor ug lokal nga mga opisyal sa DPWH. Pero maapil bang politiko nga nagpalusot sa budget para sa proyekto?
Kon tuohan ang testimoniya sa mga inhinyero sa DPWH sa binahinay sa kawat, ang politiko nakadawat og 25% sa kinatibuk-ang budget. Kinsa may nakabolsa sa ?475 milyones?
-o0o-
Gawas sa Mananga, nakamugna sab sa makalilisang nga baha ang laing duha ka suba nga gibuboan sab og minilyon ka pesos para sa flood-control projects --ang Butuanon River sa Cebu City ug Mandaue City ug ang Cotcot River sa Liloan ug Compostela.
Hinaot nga sa kataposan masusi na g’yung mga proyekto sa Sugbo nga, sama sa ubang bahin sa nasud, dili maoy labing gikinahanglan sa mga molupyo, nahimutang sa sayop nga mga lugar, sayop ang desinyo maong imbes makasulbad nakapasamot sa baha, substandard ang materyales nga gigamit, ug labaw sa tanan dili igkita bisan hingpit nang nabayran sa kakonsabong mga buaya sa DPWH.
- Latest
