Pagbarato sa lana
Maapektahan dayon ang Pilipinas sa resulta sa eleksiyon sa Estados Unidos karong semanaha tungod sa pagtibugsok sa presyo sa lana. Nangagpas ang mga eksperto sa Department of Energy (DOE) nga mobarato og kapin sa ?10 kada litro ang gasolina ug kapin sa ?3 kada litro ang diesel ug kerosene sa Martes sunod semana.
Tungod kini sa pagtuo sa mga kalibotanong merkado sa lana nga mas gamay ang kahigayonan nga molapad ang gubat sa Iran. Tungod sa nagsunod nga kapildehan nilang U.S. President Donald Trump ug Israeli Prime Minister Benjamin Netanyahu.
-o0o-
Si Trump mismo napugos pag-angkon nga ang gubat sa Iran nga niresulta sa mas taas nga presyo sa gasolina ug diesel ug inadlawng palaliton sa mga Amerikanhon maoy rason nga gilampornas ang Republicans sa House of Representatives ug sa Senado.
Maong masaligon ang oil traders nga si Trump dili na motinuod sa iyang hulga sa paglusad og mas lapad nga bombardiyo batok sa Iran, nga gikabalak-an nga tubagon sa Iran og mas lapad nga panimawos batok sa alyadong mga nasud sa Estados Unidos sa Middles East, human sa eleksiyon.
-o0o-
Gilaoman sab nga mas paspas nga maablihan ang Strait of Hormuz pinaagi sa diplomasiya, dili sa gubat, tungod sa pagkaparot ni Netanyahu sa eleksiyon sa Israel sa niaging buwan.
Dili nang kahunghong si Netanyahu ni Trump pagpaulbo og dugang pulbora. Putlon nang Trump ang $4 bilyones nga tinuig nga tabang sa Israel sa 2027. Kon ipatuman sa bag-ong liderato sa Israel ang arrest warrant sa International Criminal Court, magkuyog og prisohan silang Netanyahu ug kanhi presidente Rodrigo Duterte.
-o0o-
Mahimong mas malungtaron kay sa sunod nga eleksiyon ang pagbarato sa lana kon matinuod ang pangagpas sa oil traders: Ang mas dakong impluwensiya sa Democrats sa Estados Unidos, labi na kon makabalik sila sa White House sa 2028, magkahulogan sa:
•Mas paspas nga paglambo sa limpiyong renewable energy sa labing dakong ekonomiya sa planeta ug sa alyadong mga nasud, sama sa Pilipinas (Saudi Arabia nagtukod na og solar farms sa mga disyerto nga may kapasidad nga kapin 8,000 megawatts); nga magkahulogan og
•Mas ubos nga kalibotanong demanda sa giisip nga hugaw nga lana.
- Latest
