Padugang sa pusta

Dihang gilaslasan sa House of Representatives og sobra sa katunga ang kapin sa ?2 bilyones nga budget nga gipangayo ni Bise Presidente Sara Duterte Carpio para sa sunod, nipahibawo ang mga senador nga aprobahan nila ang mas dakong budget sa Office of the Vice President (OVP).

Pero walay nisupak dihang ang Senate Finance Committee nga gipangulohan ni Senador Grace Poe niaprobar sa dakong laslas. Ug gawas sa mga alyado sa bise presidente nga silang Bato dela Rosa ug Bong Go, giaprobahan sa plenaryo sa Senado ang ?1.3 bilyones nga laslas.

* * *

Mga senador nga niawhag sa pagpatigbabaw sa tradisyon sa dili pagkutikuti sa OVP budget nipasabot nga samtang giisnab ni VP Sara ang budget hearings sa appropriations committee ug sa plenaryo sa House, nitambong siya ug nanubag og mga pangutana sa mga deliberasyon sa Senado.

Duna lay problema: Samtang nitambong si VP Sara sa pagtuki sa iyang budget sa plenaryo sa Senado niadtong Miyerkules, samang adlaw nga nitan-aw siya sa testimoniya ni kanhi presidente Rodrigo Duterte sa House Quad Committee, wala mosumiter ang OVP sa mga dokumento nga gipangayo sa Senado.

* * *

Kon walay gitagoan si VP Sara, nganong nagdumili man siya sa pagtubag sa lehitimong mga pangutana sa mga kongresista giunsa sa paggasto ang ?612.5 milyones nga confidential funds sa OVP ug Department of Education (DepEd) sa 2022 ug 2023? Maglisod ba pagpasabot kinsa si Mary Grace Piattos ug giunsa paghurot ang ?16 milyones para sa safehouses sulod lang sa 11 ka adlaw?

Ug nganong hasta ang Senado gihikawan man sa mga dokumento sa kapuslanan sa iyang budget sa 2025?

* * *

Gawas ni Go ug Dela Rosa, si Senador Sherwin Gatchalian (nga nagpa-goryo-goryo sa Cadillac Escalade sa iyang pamilya nga nisibat human nanglapas sa busway sa EDSA) nipasalig nga mahimo pang umintohan ang OVP budget.

Pero ang mga senador maayong mopadugang sa pusta. Magpaukyab sa ila kunohayng ka-independente. Pinaagi sa paghupot og mga baruganan nga sukwahi sa House ug sa Malacañang. Pero ang tinuod nga tuyo maong pagseguro nga mahatag ang mga pabor nga ilang gipangayo gikan sa administrasyon. Maong sa aktuwal nang botasyon, ilang mga boto motakdo sa bisan unsay isugo sa Palasyo.