Dili makapamuyboy

Dili angay nga mamuyboy ang mga dumadapig ni kanhi presidente Rodrigo Duterte sa mga kongresista nga iyang mga alyado sa una pero isog nang nangimbestigar sa House Quad Committee sa niaging semana. Bisan pa kon tinuod nga nakapahimulos ang mga kongresista og daghang pabor gikan sa iyang administrasyon.

Kay ang nahatag nga mga proyekto sa ilang mga distrito, nga mahimong nakapnan nila og komisyon dili gikan sa bolsa ni Duterte kon dili gikan sa buhis sa katawhan. Nga posibleng sa wala pa moabot nila gikapnan sang Duterte og mas dako pa.

* * *

Gawas pa, ang pork barrel ug ubang mga pabor nga gihatag ni Duterte ngadto sa mga kongresista nga nisipsip niya wala manukad sa iyang kamanggihatagon. Labaw nang wala magkahulogan nga bulawanon siya og kasingkasing.

Gihatag ni Duterte ang kasagaran sa mga gipangayo sa mga kongresista kay giisip niyang usa sa mga obligasyon nga kinahanglan niyang tumanon aron magpabilin sa gahom. Aron walay mobaraw sa laktod nga pinatyanay sa iyang drug war. Ug aron walay masina ug magkuti-kuti sa gipasangil nga mas lapad nga pangurakot sa iyang pamilya ug mga kakonsabo.

* * *

Kon mao nga mga balimbing diay ang pipila sa mga kongresista nga ni-utingkay sa lapad nga binayranay sa extrajudicial killings ni Duterte, duna bay maayong resulta ang ila ng imbestigasyon? Hinaot nga duna. Kay naglaom ang mayoriya nga ang Quadcomm makatabang sa pagpaningil sa mga Duterte sa ilang mga atraso.

Gawas pa, ganahan tang motuo nga gipasagdan sa mga kongresista ang pangabuso ni Duterte dili tungod kay uhaw sab sila og dugo ug utok sab sila og pulbora. Kon dili nipaundayon lang sa naandan nga pag-abiba sa Malacañang aron kapiskan og grasya ang ilang distrito.

* * *

Dili anghel ang mga kongresista nga nangimbestigar ni Duterte. Kay dili man tang kapaabot nga mga deboto ni Beato Teofilo Camomot ang mga sakop sa Quadcomm.

Pero dili sab angayng isalikway ang kadako sa tabang sa ilang nahipos nga mga ebidensiya batok sa mga responsable, nga hinaot makahatag og hustisya sa mga biktima, sa usa sa labing duguon nga yugto sa atong kasaysayan. Kay tinuod ang sulti sa atong katiguwangan: Ang Ginoo molihok sa misteryusong mga paagi.