Tiwasan ang mga Duterte
Dili pa andam nga moangkon ang mga kongresista. Pero naklaro nga mga Duterte ang tinuod nga target sa ilang mga imbestigasyon: Si kanhi presidente Rodrigo Duterte ang apikihon sa House Quad Committee; ug si Bise Presidente Sara Duterte ang puntirya sa House Committee on Good Government.
Gideklarar na hinuon nga hatagan ang mga Duterte sa tanang pagtahud. Aron nga dili makapangangkon nga gidaug-daog sila sa administrasyon: Dili pugson ang amahan ug anak sa pag-atubang sa ilang mga imbestigasyon; ug dili sila prisuhon kon padayong mobalibad sa daghan nang mga imbitasyon.
* * *
Wala na sab mopakita ang bise presidente ug iyang mga representante sa laing hugna sa imbestigasyon sa Committee on Good Government gahapon. Wala pa ipadakop pero girekomendar nang luwatan og immigration lookout bulletin order ang pito ka sinaligan sa Office of the Vice President (OVP).
Kon dili gihapon pakita ang kanhi presidente sa public hearing sa Quadcomm ugma, gamiton sa mga kongresista ang tanan niyang gipanulti under oath sa pagsukitsukit ni Senador Risa Hontiveros ug sa pagyangu-yango sa ubang mga sakop sa Senate Blue Ribbon subcommittee sa niaging semana.
* * *
Mahimong pahimungtan sa QuadComm ang mga kanhi hepe sa Philippine National Police (PNP) nga ginganlan ni kanhi presidente Duterte nga nahimong mga kumander sa iyang death squad sa Davao City. Kay dili man makapasalipod sa kurtesiya nga gihatag sa House ngadto sa mga Duterte, mapugos pag-atubang ug pagpanghimakak sa pasangil sa kanhi presidente ang mosunod:
Police General Vicente Danao;
Police General Archie Gamboa; ug
Police General Debold Sinas.
* * *
Kon tinud-on ni House Speaker Martin Romualdez ang pasalig sa iyang diskurso nga tiwason ang mga imbestigasyon bisan kinsa pay mobabag, ang suporta sa tibuok administrasyon moseguro nga kapaninglan ang amahan ug anak sa tanang pasangil sa lapad nga pangurakot ug laktod nga pinatyanay.
Kon ang pasalig sa samang diskurso ni Romualdez pagpatigbabaw sa kamatuoran batok sa kahangol sa gahom ug katigayonan milagro nga tumanon sab nila sa administrasyon --pinaagi sa pag-uli sa ilegal nilang katigayonan ug pagbayad sa ?203.8 bilyones nilang utang sa estate tax-- mahimong si Romualdez ang makabuak sa kasaysayan: Nga sukad masukad wala pay pangulo sa House nga na-presidente.
- Latest
