Walay mapili nila
Nahibawo ta nga ang gatosan ka polis nga nironda sa gituohan nga mga tagoanan ni Apollo Quiboloy sa Davao City mahimo rang molingiw kon alyado pa sa pastor ang nagtungkawo sa Malacañang. Nahibawo ta nga tungod ra sa away sa mga kampo nilang Presidente Ferdinand Marcos Jr. ug kanhi presidente Rodrigo Duterte nga nalusad ang labing lapad nga operasyon.
Pero nakabatyag gihapon ta og gamayng katagbawan. Nga mahimo diayng madutlan sa balaod bisan ang mga nagpatuo nga labing hawod. Apil nang mga nangangkon nga maoy tinuod nga agawon sa kalibotan.
***
Nahibawo tang tanan nga ang mga kongresista nga nangimbestigar sa laktod nga pinatyanay sa drug war ni Duterte mao ra sab ang nitabon sa duguon nga kampanya sa niaging administrasyon. Nahibawo ta nga karon na lang nangisog kay ilang pangulo nga si House Speaker Martin Romualdez niisip ni Bise Presidente Sara Duterte Carpio nga dakong babag sa ambisyon pagbanos sa Malacañang sa 2028.
Pero nakatuaw gihapon ang atong mga kasingkasing og gamay nga pasalamat. Nga ang mga nagtuo nga kublan sa balaod mahimo diayng patubagon sa ilang mga krimen.
***
Nahibawo tang tanan nga ang pagbalitok sa administrasyon sa pagsaad nang ipatuman ang arrest warrant sa International Criminal Court (ICC) batok ni Duterte ug sa iyang mga sinugo karong tuiga nahimo lang tungod sa panagbangga sa kahakog: Ang mga Duterte gustong mobalik sa palasyo; samtang ang mga Marcos gipasanginlang gustong magpabilin sa gahom lapas sa ilang termino.
Pero gihangop gihapon nato ang gamayng saad sa hustisya. Nga ang linigwatay sa politika mahimong makadapadali sa adlaw sa panudya.
***
Pero dili ta angayng hingpit nga magsaulog. Bisan mapriso si Quiboloy ug mapamatud-an ang crimes against humanity nga gipasangil batok ni Duterte. Kay magpasabot nga mahimong mas gamhanan ang mga Marcos. Ug walay mapili sa mga Marcos ug mga Duterte.
Maong padayon tang magpakabana. Ang ilang away dili para sa nasud ni sa katawhan. Kon dili para sa ilang personal nga mga interes. Kon dunay mohagsa, atong bantayan ang magpabiling magbarug. Ug pabiling mangandoy nga moabot ang adlaw nga mapatuman nang balaod. Bisan kinsay nagtungkawo sa gahom. Bisan kinsay hingtungdan. Ug bisan kinsay maig-an.
- Latest
