Sila ra gihapoy pinangga
Sa makausa pa, sa iyang pagpangunay pagduma sa mga paningkamot pagsulbad sa kahuot sa trapiko sa Metro Manila, gipahinumdoman ni Presidente Noynoy Aquino ang katawhan nga gawas sa iyang pagka pangu sa nasud siya sab ang labawng mayor sa labing dagkong mga dakbayan sa kaulohan ug nga siya ang tigsulbad sa labing dakong mga suliran nga angay untang itugyan ngadto sa lokal nga mga opisyal.
Naproblema sab ang trapiko sa Metro Cebu. Samang nagsugod na sab pagkabara ang mga sakyanan sa mga dakbayan sa Tagbilaran sa Bohol, Davao sa habagatang Mindanao ug Cagayan de Oro sa amihanang Mindanao. Apan way panahon si Aquino pagtabang nila. Natingob ang iyang atensiyon sa kaulohan.
***
Dihang nagsunodsunod ang mga bulilyaso sa LRT ug MRT sa Metro Manila, nagkapuliki silang Transportation Secretary Emilio Abaya ug ubang mga sakop sa gabinete ni Presidente Aquino pagpasalig sa mga pasahero nga gihimo sa nasudnong gobyerno ang tanan aron pagsulbad sa problema.
Apan hangtod karon wa kairog ang BRT sa Dakbayan sa Sugbo nga gisugyot ni kanhi Mayor Tommy Osmeña niadtong 1990s, gitun-an sa DOTC niadtong 2008 ug giaprobahan sa NEDA Board sa niaging tuig. Wa gyod gani mapiski og pundo alang sa mass transport system ang ubang mga dakbayan ug lalawigan. Bahala na nga ang tanang Pilipinhon ang nagbayad sa subsidized nga plitehan sa LRT ug MRT.
***
Hastang mga problema sa grabeng baha, wa makolektang basura, nagsaka nga kriminalidad ug bisan sa pagkabara sa mga pantalan sa kaulohan aktibo nga gipanginlabotan nilang Aquino ug ubang mga tagduma sa Malakanyang.
Apan wa silay pagpakabana sa samang mga suliran sa ubang bahin sa nasud. Igo lang mopasalig nga gihatagan na sa tanang gahom ug pundo ang lokal nga mga opisyal sa pagsulbad sa nagbuntaog nga mga suliran. Mahibung pa ba ta nganong ang labing dakong bahin sa nasudnong budget padayon nilang gidam-ok sa kaulohan ug mumho ray gisabod sa mga lalawigan?
***
Salamat sa kahiktin sa panglantaw sa mga tagduma sa Malakanyang, nga kutob ra sa tumoy sa ilang ilong ang makit-an, nisamot kahuot ang Metro Manila. Kay tua man ibubo ang kinadak-ang pundo pagsapaw-sapaw sa kadalanan ug mga taytayan ug ubang istruktura, nasuyop sab ang kinadaghanang mga negosyante ug mga trabahante.
Kay tua man magpuyo silang Aquino ug kaubanan, padayon nilang makit-an ug atimanon dayon ang labing gagmayng libaong ug lim-aw ug kanunayng mauwahi pagtagad ang hapit na mangalumos nga mga molupyo gawas sa Metro Manila. Maong, pasayloa, bisan ang pagtinagalog ni Aquino giisip nga laing simbolo nga hangtod karon, 117 ka tuig human nakalingkawas ang mga Sugbuanon gikan sa mga Katsila, ang Pilipinas tua lang diay gihapon magsugod ug matapos sa Metro Manila.
- Latest
