Kabuot sa kakahoyan
Kon mosupak ang Department of Environment and Natural Resources sa pagpamutol sa mga kahoy nga maagian sa pagpalapad sa kadalanan ug ubang infrastructura, nahimo nang lagda ni Highways Secretary Rogelio Singson nga di makiglalis ni moinsistir sa kamahinungdanon sa proyekto. Gimandoan niyang lokal nga mga opisyal sa DPWH sa pagpatipas sa dan o sa paghunong gyod sa trabaho.
Mao ni hinungdan nga hangtod karon wa mapalapdi ang nasudnong highway sugod sa lungsod sa San Fernando hangtod sa Dakbayan sa Carcar sa habagatang Sugbo. Mao sab ni hinungdan nga mas lapad ang sidewalk kay sa agianan sa mga sakyanan sa M. L. Quezon Avenue sa Dakbayan sa Lapulapu.
* * *
Angay untang maghudyaka ang mga mahigugmaon sa kinaiyahan. Angay unta nilang pasidunggan ang DENR sa determinadong pagpatuman sa ilang mga lagda pagpanalipod sa kakahoyan. Angay untang pasalamatan ang DPWH sa wa pagsakripisyo sa kalikopan alang sa kadalanan ug uban nilang mga proyekto.
Apan matag higayon nga imong matandi ang kamalambuon sa mga patigayon sa Dakbayan sa Naga ug sa kabiya sa ekonomiya sa silingang San Fernando ug Carcar, maamguhan sa tanang hingtungdan nga may direktang kalambigitan ang gidak-on sa ilang kadalanan. Wa ba mahikawi ang habagatang tumoy sa Sugbo sa makiangayon untang bahin sa kalamboan sa Sugbo kon napadak-an pang highway?
* * *
Nabantang pag-usab ang dinaliang panginahanglan sa pagsubli sa kasabotan sa DENR ug DPWH pagpalabi sa kakahoyan kay sa kadalanan sa labing menos duha ka proyekto sa Dakbayan sa Sugbo:
"Nasemento nang dakong bahin sa Serging Osmeña Boulevard sa North Reclamation Area apan nagpabilin sa tungatunga ang pipila ka punoan sa kahoy kay nagdumili ang DPWH ug pribadong kontraktor pagtuman sa sugo sa DENR pag-ilis sa dul-an sa 100 ka punoan sa kahoy nga gipangawat; ug
"Napalapdan nang M. Velez Street sa uptown area apan mag-ikis-ikis ang dagan sa mga sakyanan kay gipabiling nagbarug sa tungatunga sa dan ang dagkong punoan sa kahoy.
* * *
Di makatabang sa sitwasyon ang pagpanghudlat sa mga opisyal sa Dakbayan sa Sugbo pagputol sa nahibiling mga kahoy sa Serging Osmeña ug M. Velez bisan sa pagdili sa DENR. Di paugat kon dili kabuot maoy gikinahanglan paghusay sa panagsungi.
Nganong di man mag-abot ug magsabot ang mga opisyal sa DENR, DPWH ug local government units aron makab-ot ang labing makiangayong balanse sa kadinalian sa mga proyekto ug sa pagpalambo sa kinaiyahan? Di angayng magpakabuta-bungol ang DENR sa pipila nila ka kamandoan nga gawas nga wa katabang sa mga kahoy nakapameligro pa gyod sa mga motorista ug mga pasahero. Samang di sab angayng mangluod nga morang bata nga way buot ang DPWH ug di manghudlat human gidudahang nakigkonsabo sa kawatan sa mga kahoy ang Dakbayan sa Sugbo.
- Latest
