16 ka lakang nga gintang

Kinasang-an sa Colon ug Osmeña Blvd., Cebu City -- Ako gyong gisukod. 16 ra ka lakang ang nag-uwang sa duha ka pundok sa mga mamumuo nga buwag nga nagtimaan sa Adlaw sa Pamuo dinhi. Gibanabana sa kadagkoan sa Kilusang Mayo Uno nga kapin sa 600 ang mga sakop sa ilang alyadong mga pundok nga nikuyog sa kalihokan. Kapin sa 2,000 ang banabana sa Trade Union Congress of the Philippines sa nangapil nga mga sakop sa ilang alyadong mga pundok.

Gitak-opan sa City Traffic Operations Management ang kabahin sa Colon aron di mahasol ang mga mamumuo. Tungod sa pagdumili sa mga demonstrador pagtapak sa haw-ang sa duha ka pundok, nagpabiling abli ang trapiko sa Osmeña Blvd.

***

Unang niabot dinhi ang pundok sa KMU nga gipangulohan ni Jaime Paglinawan, tsirman sa Bagong Alyansang Makabayan. Nilugsong sila gikan sa Fuente Osmeña. Human sa pila ka gutlo, nagdahunog ang banda nga nipasiuna sa delegasyon sa TUCP gikan sa compound sa Associated Labor Unions sa pantalan.

Way bisan usa nga nabalaka nga magkaguliyang ang duha ka pundok. Way mga sakop sa kapolisan nga nagpataliwa. Bisan ang traffic enforcers mas nabalaka nga mabara ang mga sakyanan, nga di hinuon sama kadaghan kay wa may klase ug wa may trabaho.

***

Kon nahitabo pa ni pila ka dekada ang nilabay, naglamuklamok na unta. Daghan uyamot nga nangagi nga mga insidente sa binatoay, sinumbagay ug binunalay dihang nagkaabot ang nagdumatanay nga mga sakop. Dihang nagtrabaho pa ko sa sibyaanan sa ALU, naka-cover mi og aktuwal nga pinusilay tali sa nagkaribal nga mga unyon sa kanhi Cebu Shipyard sa Dakbayan sa Lapu-Lapu.

Nagkasinabtanay na ba ang nagkasungi nga mga pundok? Nakaamgo na ba nga napakyas pagpanalipod sa ilang hut-ong tungod sa ilang pagkatibuwaag? O mas kalma nang ilang kadagkoan kay naniguwang na? May panahom si Professor Bebot Umbay sa University of the Philippines  nga nitambong sa rally sa KMU dinhi: Naniguwang na sila.

***

Tungod sa kalanog sa ilang mga trumpa, nagsapaway ang mga diskurso sa kadagkoan sa duha ka pundok. Dihang naminaw ko sa taliwa naklaro nga managsama ang ilang mga mensahe. Bisan ilang mga plakard ug streamers susama sab. Pulos sila nangayo og mas dakong uminto sa suholan ug mas daghang benepisyo. Pulos sila nikondenar sa kontraktuwalisasyon. Pulos sila namasangil sa pamunoan ni Presidente Noynoy Aquino nga nipalabi sa mga negosyante.

Ilang kadagkoan pulos nitataw sa kamahinungdanon sa panaghiusa. Apan niangkon nga ang panagsungi sa ideyolohiya nakababag sa ilang panagkuyog. Ambot kanus-a makaamgo nga ang panaghugpong maoy bugtong dag-anan. Makahimong mas isog sa ilang tingog ug pakigbisog alang sa makiangayong kausaban, nga wa nay gobyerno ni tag-iya sa puhonan nga makabalibad.

***

Email: [email protected]