Taphaw nga titulo

Kon duna silay kaikog, gil-asan ang batan-ong mga pari sa Simbahang Katoliko nga nahimong mga monsenyor di tungod sa talagsaon nilang nahimo kon dili tungod sa ilang kasuod sa mga obispo karong gipahibawo na sa Vatican nga gihigpitan nang Pope Francis ang mga lagda sa pagtudlo og mga monsenyor.

Karon lang bag-o gipagawas ang sugo sa Santo Papa. Nga iya na diayng giluwatan sa paglingkod sa Marso pa sa niaging tuig. Sukad diay sa iyang pagkapili nga pangu sa Simbahang Katoliko wa nay pari nga nahimong monsenyor ug giawhag niya ang mga obispo ug mga kardinal sa paghunong na pagrekomendar og mga pari nga hatagan sa maong titulo.

***

Kay ang mga monsenyor kutob ra sa ngan. Wa silay huptan nga tinuyo nga mga buhatan. Di sila sangonan og bisan unsang tinuyo nga katungdanan. Titulo ra gyod ang nadugang nila. Nga gipahimuslan sa pipila pagpaburot sa ilang ranggo kon itandi sa mga pari nga gihikawan sa samang titulo.

May sukaranan ang kabalaka ni Pope Francis nga ang pinatuyangan nga paghatag sa titulong monsenyor, inay makadasig sa mga pari pagdugang sa mga paningkamot pagpalambo sa simbahan ug sa pagtuo, makaaghat na hinuon nila sa pagsige og paduol ug pagsipsip sa mga obispo ug ubang kadagkoan sa ilang mga artsidyosesis.

***

Si Pope Francis mismo way girekomendar nga pari sa Argentina aron himuong monsenyor sa siya pa ang arsobispo sa Buenos Aires. Karong nahimutang na sa posisyon pagbadlong ning giisip nga usa sa mga nakapayagaw sa simbahan, ang Santo Papa wa mag-usik og panahon pagpahamtang sa gituohang makiangayong kausaban.

Di tanang obispo sama og panghunahuna ni Pope Francis. Sila ug ilang pinalabi nga mga pari nga mga monsenyor na karon maoy labing gil-asan ning sugo sa Vatican. Labi na nga lahi sa ubang kausaban nga gipasiugdahan ni Pope Francis--sama sa pagpuyo og mas yanong pinuy-anan ug paggamit og mas yanong mga sakyanan--di ni nila malinguglingogan ni mayatakan.

***

Ubos sa pagduma ni Pope Francis, ang mahimong monsenyor mao na lang ang mga pari nga magpangedaron og 65 pataas ug nakagahin na sa tibuok nilang kinabuhi pag-alagad sa simbahan. Gipapas nang karaang lagda nga mahimo nang monsenyor ang mga pari nga 35 anyos pataas kon irekomendar sa obispo.

Di hinuon laksion ang titulo gikan sa batan-on nga mga monsenyor. Apan kon may uwaw di na sila ganahan nga magwarawara sa taphaw nilang ranggo. May pipila hinuon nga determinadong magpapating. Mas nahigugma sa giisip nga mas dakong ranggo kay sa tinuorayng kahulogan sa mga pagtulon-an sa simbahan. Apan kon nagtuo nga kalutsan hangtod sa hangtod ang kausaban nga gidasig ni Pope Francis, makaamgo ra nga ang panudya sa tinan-awan sa nagpakabana nga mga parokyano di masagang sa bisan unsa nilang titulo.

***

Email: [email protected]