Pagkapait g'yud tawon

Pagkalooy tawon sa usa ka departamento sa Cebu City Hall nga gitawag og City Resource Management and Development Center nga atua magbase sa Barangay Taptap.

Tiaw mo? Gibutyag sa hepe sa CREMDEC Maricon Encabo nga nagkuwang sila og kwarta nga magamit sa ilang opisina kay dili na man mohatag kanila ang City Hall human ang CREMDEC giisip na nga economic enterprise department.

Sa ato pa nga ang maong departamento kinahanglang mobarug sa kaugalingon niya nga pagpaningkamot. Ang CREMDEC "nabuhi" pinaagi sa iyang kita nga pagpahigayon og training nga adunay bayad.

Ang mga kliyente niini mga opisyal ug kawani sa kagamhanan apil ang pipila ka private companies nga gusto nga adto magpahigayon og training sa ilang center sa bukid.

Apan ang problema mao kini. Maisip nga "Kakha-tuka" ang maong departamento. Kinahanglan man nga mogasto usa sila tungod sa pagpalit og mga pagkaon sa mga participants nga mag-training.

Matud ni Encabo nga wala na man sila'y kwarta unya ning mga adlawa ra ba adunay mag-training sa CREMDEC nga mga opisyal ug kawani sa barangay kabahin sa gitawag og Barangay Empowerment.

Usahay gud mapugos si Encabo sa pagpanghuwam og kwarta gikan sa mga konsehal. Pagkapait g'yud tawon sa kinabuhi sa mga opisyal sa CREMDEC. Karong tuiga, P3.8 milyones ang budget sa mga kawani sa Cremdec apan unsaon nga ang ilang kita wala gani makaabot og duha ka milyon.

Maayo lang kaniadto kay atul sa termino ni kanhi Mayor Tomas R. Osmeña gihatagan man og sustento ang CREMDEC sa City Hall apan giputol man kini sa administrasyon ni Mayor Michael Rama.      

Husto si Konsehal Alvin Dizon nga nahimong kataw-anan ang CREMDEC kay manudlo sila unsaon nga makamao ang mga opisyal sa barangay kabahin sa Good Governance apan sila wala makasulbad sa ilang problema. Unsa na ni uy!!!

* * *

Apan bisan og CREMDEC ang nakasinati niini nga problema apan adto kini mohatag og bati nga dungog ni Mayor Michael Rama. Isip amahan sa dakbayan og direkta nga nagdumala sa City Hall angay'ng sulbaron dayon niya ang maong isyu.

Para hinoon nako, makaingon ko nga bisan pa lagi og hatagan nimo'g daku nga budget ang usa ka departamento, ilabi na g'yud og economic enterprise, unya dili makakolekta sa budget, wala gihapo'y mahimo.

Sama lagi sa tag P5,000 nga medical budget sa matag usa ka taga dakbayan nga daghan ang wala makapahimulos sa kompleto nga benipisyo kay wala ma'y mga tambal?

Nakasinati ko mismo niini mao nga "authority" kaayo ko nga modiskutir niining maong isyu.

Angay g'yud nga palihukon ni Mayor Rama ang iyang mga tax collectors nga paspas unta nga mangolekta og buhis. Apan usbon nako, pagkadaghang angay'ng buhisan diha nga wala lang pabayara. Imo kini nga makita bisan diha sa nataran mismo sa City Hall.

* * *

Pagkanindot g'yud sa balay kon "double walling" apan ang problema diha kon kahoy ang kagamitan mao nga wala kay kasayuran nga ang mga anay -- kining gitawag og "termites" -- miatake na diay sa imong balay.

Magtoo ka nga lig-on pa kaayo ang imong balay kay nindot man tan-awon apan takulahaw lang kini nga mahugno. Mao kini ang akong kasinatian kagahapon dihang daw milinog sa akong balay.

Gikulbaan ko kay abi ba nako kadto og milinog na 'sab apan wala man mohatag og kumentaryo ang newscaster sa radyo nga unta mata'g linog nagtay-og pa gani mopahibalo na man dayon.

Nabantayan nako nga ang ako dia'y balay maoy mitay-og. Mao kadto nga gipasusi nako sa akong silingan og nasuta nako nga pwerteng daghana nga kabahin sa akong balay ang gipangkaon na diay sa anay.

Kay duna man ko'y silingan nga nagtrabaho sa "pest control company" ako dayon nga gipahimoan og operation ug natultolan niini ang tagoanan sa hilabihan ka daghang anay.

Ayaw mo'g kompyansa. Kon kahoy ang kagamitan sa inyong balay, mas maayo pa nga dili "double walling" apan hugaw lang tan-awon. Kon ang bongbong sa inyong balay "double" og may kisame, maayo nga duna g'yud nga kanunay ang preventive spray.