Ligoy nga mga kongresista

Sa 366 ka adlaw sa tuig 2012, ang Kongreso nakahimo lang og 61 ka sesyon. Palihog basaha ug hinaot nga di ka mongaab sa mosunod nga mga implikasyon:

•  Kalima ra nag-abot ang mga kongresista sa matag usa sa 12 ka buwan sa niaging tuig;

" Wa sila mag-abot sa 25 ka adlaw sa matag usa sa 12 ka buwan sa niaging tuig;

• Kausa ra sila nag-sesyon sa kasagaran sa 52 ka semana sa niaging tuig; ug

• Ambot may lain bang propesyon nga mas hayahay, nilungtad og 305 ka adlaw ang bakasyon sa mga kongresista sa niaging tuig.

***

Nahibawo na tang daan sa lusot sa mga kongresista: Ang pagtambong sa sesyon usa lang sa daghan uyamot nila nga mga gimbuhaton. Apan isip mga magbabalaod, ang pag-sesyon maoy labing mahinungdanong bahin sa ilang trabaho. Kay sa mga sesyon sila maka-umol og mga balaudnon pagsulbad sa labing dagkong mga suliran ug makatagbaw sa labing dagkong mga panginahanglan sa nasud ug sa katawhan.

Laing kinaham nga lusot nila mao nga naglihok sila bisan sa mga adlaw nga wa silay sesyon. Kay nakigkita, nangonsulta ug naminaw sila sa mga molupyo sa ilang distrito. Makasabot ko kon sama sa kasagaran kasukaon kang nagbasa ining bahina.

***

Sugbuanon ang kongresista nga labing daghan og palta. Si Kongresista Raymond Mendoza sa TUCP Partylist absent sa 40 ka sesyon. Sa ato pa, 21 ra ka sesyon ang iyang natambongan. Dako na uyamot og atraso si Mendoza. Nasakpan siya sa niaging tuig nga nihurot pagbubo sa iyang P75 milyones nga pork barrel sa North Cotabato nga iyang asawa maoy gobernadora. Way bisan usa ka dako nga gipisik sa Sugbo, ang base sa labing dakong sanga sa kahugpongan.

Maayo na lang nga naapil ang duha ka Sugbuanon sa listahan sa mga way absent. Silang Kongresista Cutie del Mar sa amihanang distrito sa Dakbayan sa Sugbo ug Cresente Paez sa COOP-NATCCO nakatambong sa tanang 61 ka sesyon.

***

Unsay attendance record sa ubang Sugbuanong kongresista? Nagsunod ni Mendoza silang Pablo John Garcia sa ikatulong distrito, 17 ka absent; Red Durano sa ikalimang distrito, 16 ka absent; Pastor Alcover Jr. sa ANAD Partylist nga may 15 ka absent; Benhur Salimbangon sa ikaupat nga distrito, napu ka absent; ug Tomas Osmeña sa habagatang distrito sa Dakbayan sa Sugbo, siyam ka absent.

Nagsunod sa maayong record nilang del Mar ug Paez: Eduardo Gullas sa unang distrito nga may usa ka absent; Pablo Garcia sa ikaduhang distrito nga may duha ka absent; Luigi Quisumbing sa ikaunom nga distrito nga may tulo ka absent; ug Arturo Radaza sa Lapulapu City nga may upat ka absent.

***

Email: [email protected]