Dalan sa N. Bacalso Avenue abli ra atol sa Sinulog parade

CEBU, Philippines — Magpabilin nga abli ang dalan sa N. Bacalso o Natalio Bacalso Avenue sa dakbayan sa Sugbo atol sa Sinulog grand parade.

Kini ang gisaad sa Cebu City Traffic Office (CCTO), gipangulohan ni Pastor “Jongjong” Alcover II ngadto kang gobernador Gwendolyn Garcia atol sa ilang tigom.

Anaa sa dalan N. Bacalso nahimutang ang Cebu South Bus Terminal (CSBT), ang gidumala nga terminal sa Probinsya sa Sugbo.

Matud ni Gobernador Garcia importante nga abli ra ang N. Bacalso sa Enero 19, adlaw nga Domingo atol sa Sinulog Grand Parade aron sayon nga makasulod gawas ra ang mga bus nga mohatod sa mga pasahero gikan ug padulong sa kalungsoran sa Probinsya nga mosaksi sa Sinulog.

Si Alcover misaad sa gobernadora nga ilang sigurohon nga abli ra ang N. Bacalso aron makasulod ra ang mga tawo ug ang mga bus nga mosulod ug gawas sa CSBT aron mapabilin ang regular nga operasyon niini.

Ang N. Bacalso duol ra sa Cebu City Sports Center (CCSC) kon asa ipahigayon ang ritual showdown sa mga contingents nga apil sa Sinulog sa Grand Parade.

Apan ang unom ka kilometro nga street dancing magsugod sa P. Del Rosario Street ug mopadayon sa New Imus Road, dayon sa General Maxilom Avenue, padulong sa Fuente Osmeña Circle.   MEL  BANAT NEWS