Opening salvo sa Fiesta Señor sugdan sa Walk with Jesus

CEBU, Philippines — Karong adlawa magsugod ang unang adlaw sa novena sa kapistahan ni Señor Santo Niño diin usa ka opening salvo ang himuon pinaagi sa Penitential Walk with Jesus nga magsugod sa Fuente Osmeña Circle paingon sa Basilica Minore del Santo Niño.

Karong adlawa magsugod ang novena masses ug matapos kini sa Enero 19, 2025 nga mao na ang adlaw sa kapistahan.

 si Reverend Father Jules Van Villa Almerez sa Basilica Minore del Sto. Niño nipahimangno sa mga pilgrim ug devotee nga mosulod sa simbahan nga iimplementar gihapon nila ang proper dress code, sa mga magdala og lingkuranan kadtong mga gagmay lang ug gidili ang camping chair.

Sa magdala og bags siguradohon nga dili dagko, walay luggages kini aron dili hasol inig susi.

Nagpahimangno usab sila nga inig adlaw na gyud sa kapistahan ni Señor Santo Niño nga unta dili manulod og simbahan kon adunay face paints.

Ipatuman sab sa Basilica ang 'One entrance, One exit'.

Ang entrance anha gihapon sa habig sa Magellan's Cross dayon ang exit sa habig na sa Osmeña Boulevard.

Sa mga mohawok sa imahen ni Señor Santo Niño ug modagkot og kandila gipahibawo ang tanan diha sa Facebook page ug website sa Basilica ug naay gi-post nga map sa pilgrim flow kon asa ang saktong entrances ug exits sa dagkotanan ug hawkanan.

Nunot niini, anaa na 90 porsyento nga andam ang Philippine Coast Guard sa fluvial procession sa imahen ni Señor Santo Niño karong sunod semana.

Atol sa gipahigayon nga coordination meeting sa buhatan sa Philippine Coast Guard gihan-ay na nila ang mga gimbuhaton alang sa pagsiguro nga hapsay ang gikatakdang pagpahigayon sa fluvial procession.

Higpit nga ipatuman ang pagdili sa mga sakyanan nga mosalmot kong wala makaparehistro sa PCG tumong nila nga masiguro ang compliant sa mga rekisitos sa mga fluvial participant pagsiguro nga luwas mapahigayon ang dakong kalihokan sa kadagatan matud ni Captain Jerome Lozada, PCG, Station Commander CGS Cebu.

Matud sa PCG nga gilugwayan nila ang registration sa mga mosalmot sa fluvial hangtud sa Enero 10, 2025.

Sa pagkakaron aduna nay 90 ka nagpalista nga moapil sa prosisyon sa kadagatan. — Rowena D. Capistrano/BDB BANAT NEWS