Send-off ceremony

CEBU, Philippines — Andam na ang 3,031 ka security personnel nga mobantay sa mga kalihokan sa Fiesta Señor 2025 diin kagahapon sa buntag gipahigayon ang send-off ceremony diha sa Cebu City Sports Center.

Ang 3,031 ka security personnel gilangkuban kini sa 1,028  ka PNP personnel, 130 gikan sa BFP, 200 gikan sa Philippine Navy,  100 gikan sa Philippine Army, 50 gikan sa Philippine Coast Guard, 20 gikan sa DOH-7, 100 gikan sa OCD ug CCDRMO, 620 ka BPSO, 150 ka BPATS, 100 ka Task Force Kasaligan ug Barangay Fire Brigade ug 50 ka CCTO personnel.

Ang send-off ceremony gisugdan sa Santos nga Misa ug gibendisyonan usab sila alang sa ilang kaluwasan subay paghimo sa ilang mga trabaho.

Nitambong usab sa kalihokan si Cebu City Mayor Raymond Alvin Garcia kinsa niawhag sa kapolisan nga ipatuman ang hugot nga seguridad ug ipatigbabaw ang maximim tolerance.

Samtang si Police Lieutenant Colonel Maria Theresa Macatangay, deputy city director for operations ug tigpamaba sa Cebu City Police Office nagkanayon nga all set na sila ug madugangan pa ang pwersa nga mopatuman sa kahapsay ug kalinaw sa Sinulog 2025.

Matud ni Macatangay nga ilang girekomendar sa kagamhanan sa Dakbayan sa Sugbo ang signal jamming apan ang Cebu City Government una nang nagpahibawo nga walay signal jamming nga mahitabo.

Nunot niini, si Garcia nagkanayon nga dako kaayo role ang tigpatuman sa balaod niining nagsingabot nga Sinulog hinungdan nga nagpasalamat siya sa dedikasyon ug sakripisyo ug commitment nga gipakita sa mga tipatuman sa balaod.

Si Garcia nipadayag sa maong mensahe atol sa send-off ceremony kagahapon sa mga moserbisyo sa Fiesta Señor.

Matud ni Garcia nga ang Sinulog Festival sobra pa sa selebrasyon tungod kay mao kini ang kasing-kasing sa Sugbo nga abunda kaayo sa cultural and religious heritage diin mao kini ang panahon nga minilyon ang maghiusa alang sa ilang pagtuo ug selebrasyon alang kang Señor Santo Niño nga maoy tinubdan sa paglaum ug kusog.

Ug ang maong selebrasyon makapahiusa sa tanang Sugboanon nga nagdasig sa mga bisita gikan sa lain-laing dapit sa kalibutan.  Preciosa L. Bacalso ug Rowena D. Capistrano/BDB BANAT NEWS