Lungsod sa Badian tinguha nga modaghan pa ilang mga turista

CEBU, Philippines — Gitinguha karon sa lokal nga kagamhanan sa lungsod sa Badian nga mas modaghan pa ang mga mobisita nga mosuroy sa ilang lungsod partikular na sa mga iladong tourism destination niini.

Si Eal Endab ang tourism officer sa lungsod sa Badian positibo nga mas modaghan pa ilang mga bisita ilabina ang mga mosuway sa canyoneering activity ug sa Kawasan Falls.

Sumala ni Endab nga sobra 1, 000 ka mga bisita matag adlaw ang ilang natala nga moadto sa ilang tourism destinations.

“Mao na ang among aim nga this year, mosaka sya. We are positive nga more this year. at least 40-50% nga increase from 2024” matud ni Endab.

Dugang pa usab sa tourism officer sa tuig 2024, miabot sa P500 million ang kita sa LGU gikan sa ilang turismo nga mao usab ilang tinguha nga mosaka karong tuiga.

Usa sa mga sikat sa Badian mao ang extreme adventure sa canyoneering nga maoy kanunay gusto suwayan sa mga bisita hilabina sa mga batan-on.

Sa maong revenue o kita tibook tuig, gibahin kini sa mga tour operators, tour guides, sa lokal nga panggamhanan ug sa probinsya sa Sugbo.

Gikan sa P1, 500 nga rate kaniadto, nahimo na karon nga P2, 000 ang rate matag usa ka bisita sa canyoneering.

Base kini sa Badian Municipal Ordinance ug sa Cebu Provincial Ordinance nga milatid sa rate sa canyoneering nga kalihokan sa Badian ug uban pang regulasyon.

Apil sa dos mil nga bayad ang sa tour guide nga accredited sa Department of Tourism (DOT), operator, pagkaon, tubig, energy bar, canyoneering gears lakip na ang administrative ug environmental regulatory fee.

Walay labot sa P2, 000 ang transportasyon.

Matud ni Endab nga usa pud sa kabag-ohan nga nakatampo mao nga ang one guide matag usa ka guest gikan sa usa ka guide nga moalagad sa upat ka mga guest sa canyoneering.

“Ato man gud nakita ang importansya sa pagprotect sa environment ug pagregulate ani atong activity after incident of Odette, maong naa tay mga changes nga giinstall sa atong canyoneering area, maong gi-higher nato ang rate, plus atong additional water and energy bar para sa atong tourist” matud pa ni Endab.  MEL  BANAT NEWS