Talawan ug walay Batasan

Dugay na nga nisaad si Bise Presidente Sara Duterte nga tubagon ang tanang mga pasangil batok niya ug panalipdan ang iyang kaugalingon sa sakto nga forum. Ang iyang impeachment trial nga sugdan na karong alas-2 sa hapon mao ang labing sakto nga forum. Wala nay rason nga ipadayon ang iyang paboritong alkontra sa tanang pasangil --ang paglikay ug pagpasalipod sa walay kinutoban nga technicalities.

Ang Senate impeachment court maoy gihatagan sa 1987 Constitution sa eksklusibo nga gahom sa paghusay sa articles of impeachment. Ang nanumpa na nga senator-judges maoy gisugo sa pagtimbang-timbang sa mga pasangil ug mga ebidensiya pabor ug supak niya. Kon ganahang molimpiyo sa iyang ngalan, dili siya angay nga motago gikan nila.

***

Ambot unsay buot ipasabot sa iyang pagpasidaan og bloodbath, o duguon nga engkuwentro, inig atubang sa mga nipasangil niya ug sa senator judges nga mohusay niya. Walay nakaseguro kon nanghudlat ba g’yud o, sama sa naandan, nagpaukyab lang.

Hinaot nga dunay makasulti ni VP Sara nga walay engkuwentro nga mahitabo kon dili siya mopakita. Hinaot nga may makapahinumdom niya nga walay dugo nga mobanaw, ambot kon tinuod bang dugo o init lang nga lalis ang iyang gipasabot, kon kutob ra siya sa Facebook posts ug pinili nga media interviews.

***

Karon na ang panahon nga iyang pamatud-an ang iyang kaisog. Kana kon wala moliwat sa iyang amahan nga nagsige lang og likay-likay sa pasiunang mga husay sa International Criminal Court sa iyang kasong crimes against humanity.

Kon mopakita sa unang adlaw sa iyang impeachment trial, mapasundayag ni VP Sara ang iyang pagtahud sa katungod sa katawhan sa pagpakisayod. Giunsa paggasto sa impeachable officials sama niya, nga dili mapasakaan og ordinaryong mga kaso sa ordinaryong mga korte, ang siningtan nilang buhis.

***

Kon walay gikahadlokan, ipakita ni VP Sara ang iyang income tax returns. Dili sab mopasaka og laing petisyon sa Korte Suprema batok sa pag-abli sa iyang bank accounts nga gidudahang dunay binilyon ka pesos.

Kon igo lang gihapon nga mopadala sa 16 niya ka abogado, talawan si VP Sara. Ug walay batasan. Dili gani magtagad sa pagpasabot sa mga magbubuhis. Giunsa niya sa pagwaldas ang ilang kuwarta.