Alas sa ICC batok Duterte
Kon ang tuyo ni Senador Imee Marcos pagpadayon sa public hearing sa pagdakop ug pagbalhog sa The Hague ni kanhi Presidente Rodrigo Duterte mao ang pagluwas sa nitibugsok niyang kandidatura, mahimong pakyas siya. Kon basehan ang kamingaw sa reaksiyon sa mga botante. Pero mahimong nilampos siya sa pagpahibawo sa publiko:
Unsa kalapad ang imbestigasyon ug unsa kalig-on ang mga ebidensiya sa International Criminal Court (ICC) sa extrajudicial killings (EJKs) nga gipasangil batok ni Duterte; ug
Unsa kamatinabangon ang administrasyon sa iyang manghod nga si Presidente Ferdinand Marcos Jr. sa ICC.
* * *
Kon tinuod ang mga dokumento ni Imee nga nag-detalye sa lihok sa prosecutors sa ICC sa ilang pagduaw sa Pilipinas sa niaging tuig, panington og bugbog si Duterte sa pagpanalipod sa iyang kaugalingon sa umaabot niyang husay sa ICC:
Naka-istorya nilang mga polis nga gituohang apil sa EJKs (nitakdo kini sa pangangkon ni kanhi Senador Antonio Trillanes IV sa Abril sa niaging tuig nga na-interview sa ICC ang 50 ka aktibo ug retiradong mga polis); ug
Gihipos nilang hospital records ug ubang mga dokumento sa nangamatay nga drug suspects.
* * *
Mosamot ka walay tarung nga kinatulgan si Duterte sulod sa iyang selda tungod sa kasayuran ni Imee nga makadugang sa pagduda nga si Koronel Royina Garma nitabang na sa ICC.
Kay ang prosecutors nangayo sa bank records ni Peter “Pedro” Parungo (sinaligan ni Koronel Edilberto Leonardo) ug call records ni Irmina “Muking” Espino (sinaligan ni Senador Bong Go) nga ginganlan ni Garma atubangan sa House Quad Committee nga maoy nipatuman sa rewards system sa EJKs.
* * *
Kon nakatsamba si Imee pagsabot sa nahipos niyang mga dokumento nga hagbay rang nitabang ang administrasyon sa ICC, molig-on ang mga pasangil nga mga ekspero sa ICC maoy nitabang sa mga kongresista pagkuha sa labing mapuslanong mga testimoniya gikan nilang Duterte ug ubang resource persons. Angay sang kahadlokan ni Duterte ang posibilidad nga naa na sa ICC ang mga ebidensiya sa kumpisal ni Justice Secretary Boying Remulla atubangan sa komitiba ni Imee sa niaging buwan nga:
95% sa gidudahang EJKs walay police reports; ug
Natusak sa mga bala ang mga biktima sa giingong nangamatay sa cardiac arrest ug natural causes.
* * *
- Latest
