Lalaki binoga sa Quezon City, patay

MANILA, Philippines — Patay ang isang lalaki matapos na barilin ng hindi pa nakikilalang suspek, kahapon ng mada­ling araw sa Quezon City.

Nakilala ang biktima na si Ednan Romero Laborada, 37, residente ng Camia St., Sitio San Roque II, Brgy. Bagong Pag-asa, Quezon City.

Batay sa imbestigasyon ng Quezon City Police District (QCPD), nangyari ang insidente dakong alas-4:55 ng madaling araw sa Sampaguita St., Sitio San Roque II, ng nasabing barangay.

Ayon sa pulisya, nakarinig ng putok ang security guard na si Jalaine Mamaunte Maunday mula sa nasabing barangay.

Nang kanyang puntahan, nakita niya ang biktima na duguan sa semento.

Agad na humingi ng tulong si Maunday sa barangay at sa Station 15 ng QCPD.

Ayon sa SOCO team mula sa QCPD-FU sa pangunguna ni PCpt. Jovelyn De Asis Maggay, isang tama ng bala ng baril sa ulo ang tinamo ng biktima habang isang basyo ng bala ang nakuha sa crime scene.

Nagsasagawa ng follow-up investigation ang pulisya upang matukoy ang suspek at motibo sa pamamaslang.