Aberin nimando nga ipakatap ang daghang polis

CEBU, Philippines — Nibisita si Police Regional Office-7 Director Brigadier General Anthony Aberin sa Cebu City Police Office (CCPO) sa miaging adlaw ug usa sa mando niini mao ang pagpalambo sa police visibility sa dakbayan sa Sugbo kini subay na sab kamanduan ni Chief PNP Police General Rommel Marbil.

Matod ni Police Lieutenant Colonel Janette Rafter, Deputy City Director for Administration sa Cebu City Police Office nga ang presensiya sa kapolisan dako og epekto nga mapakgang ang mga kriminal nga mohimo og dautan.

"We cannot really say nga dili na gyud sila mobuhat but again the presence of the policeman is to erase the opportunity diha sa atong mga criminals pagbuhat sa dili nila maayong plano", sigon ni Lt. Col. Rafter.

Gipangutana ang mga Station Commanders sa ilang total strength versus sa mga beat patrollers.

Kini tungod kay gusto ni Brigadier General Aberin nga duna gyuy igong gidaghanon ang mga police personnel nga gitagana alang sa pagpalambo sa police visibility.

Sa kasamtangan, dinhi sa siyudad sa Sugbo makita sa kadalanan ang kapolisan nga nakatabang sa pagkunhod sa kaso sa pagpanglabni. "Wala mi nag ingon nga wala na gyuy snatching nahitabo but it really went down, crime against property really went down gyud to a certain significant numbers”. Suma pa ni Col. Rafter. — MEL BANAT NEWS