Pinakamatandang mekaniko sa mundo, patuloy pa ring nagkukumpuni ng sasakyan sa edad na 97
SA edad na 97, si Fabio Sabbioni, ang pinakamatandang mekaniko sa mundo, ay patuloy pa ring nagkukumpuni ng mga sasakyan sa kanyang talyer sa Arezzo, Italy. Itinanghal siyang record holder noong 2022 at muling kinilala noong 2024.
Mula sa pagiging simpleng mekaniko noong 1946 hanggang sa pagtatayo ng kanyang sariling talyer noong 1979, si Fabio ay naging saksi sa maraming makasaysayang pangyayari, kabilang ang pag-unlad ng industriya ng automotive.
Sa kabila ng kanyang edad, masigla pa rin siya sa pag-aayos ng mga sasakyan at pagbibigay ng roadside assistance, na nagpapakita ng kanyang dedikasyon sa propesyon.
Hindi inaasahan ni Fabio na magtatrabaho pa siya sa ganitong edad, ngunit ipinagmamalaki niya ang kanyang trabaho. “Mas mukhang bata ako sa aking edad,” pabiro niyang sinabi.
Bagama’t maaari na siyang magretiro, mas pinili niyang magpatuloy sa paggawa ng kanyang minamahal na trabaho. Para sa kanya, ang pagiging mekaniko ay hindi lamang hanapbuhay kundi isang buhay na puno ng kasiyahan.
- Latest
