EDITORYAL - Katarungan sa ­pinatay na PCSO official

Karumal-Dumal ang pagkamatay ni Philippine Charity Sweepstakes Office (PCSO) board secretary Wesley Barayuga noong Hulyo 30, 2020. Pinagbabaril siya ng nag-iisang gunman sa Mandaluyong City pasado alas tres ng hapon galing sa opisina. Nakunan ng CCTV ang pamamaril. Nakatigil sa kanto ng Calba­yog at Malinao Streets sa Bgy. Highway Hills, ang sasakyan ni Barayuga nang dikitan ng gunman.

Sinigurado ng gunman na patay si Barayuga kaya ilang beses binaril. Nasugatan naman ang driver ni Barayuga. Bago naging PCSO official, dating one-star police general si Barayuga at nagtapos sa Philippine Military Academy.

Makaraang mapatay, lumabas na “high value target” umano si Barayuga at nasa drug lists ng Duterte administration. May kaugnayan umano ang pag-ambush dahil sa pagkakasangkot nito sa illegal drugs. Marami ang hindi makapaniwala lalo na ang mga mistah nito sa PMA. Kilala nila si Barayuga na mabuti at straight na tao. Nanatiling simple sa kabila na mataas ang ­posisyon sa PCSO. Wala itong sasakyan at nagko-commute papasok sa trabaho. Hindi matanggap ng pamilya ni Barayuga ang nangyari. Wala namang nagawa ang PNP at NBI ng mga panahong iyon.

Makalipas ang apat na taon, isang nakahihindik na rebelasyon ang lumutang sa totoong nangyari kay Barayuga. Lumantad si Lt. Col Santie Mendoza ng PNP Drug Enforcement Group (PDEG) sa hearing ng House quad committee at isiniwalat ang pagpatay kay Barayuga at kung sino ang mga nasa likod nito. Lumantad umano siya sapagkat gusto niyang manaig na ang katotohanan. Napag-utusan umano siya para ipapatay ang isang taong walang kasalanan.

Ayon kay Mendoza, inutusan umano siya ni dating NAPOLCOM Commissioner Edilberto Leonardo na patayin si Barayuga sa utos ni dating PCSO General Manager Royina Garma. Ayon kay Mendoza, ipinapapatay si Barayuga dahil sangkot ito sa illegal drugs. Nang sabihin umano ni Mendoza na magsasagawa siya ng profiling kay Barayuga, sinabi ni Leonardo na hindi na kailangan. Sabi pa raw ni Leonardo, ang isasagawang pagpatay ang magdidikta sa direksyon ng kanyang karera bilang pulis. Binigyan siya ng P300,000. Kinontak niya ang asset na si Nelson Mariano at ito naman ang kumontak sa gunman na kinilala sa alyas Loloy. Itinanggi naman nina Garma at Leonardo ang akusasyon ni Mendoza. Pinag-aaralan ng government prosecutor kung gagawing state witness si Mendoza.

Nararapat nang gumalaw ang Justice department para masampahan ng kaso ang mga itinuturong “utak”. Isilbi ang hustisya kay Barayuga na apat na taong naipagkait.