EDITORYAL - Higpit ngayon luwag bukas

ILANG ulit nang ipinagbawal ang paggamit ng wangwang, blinkers, sirens, signaling at flashing devices at iba pa. Noong Abril 11, ipinagbawal ni President Ferdinand Marcos Jr. sa mga opisyal at tauhan ng gobyerno ang paggamit ng mga illegal attachment. Ang kautusan ay nakapaloob sa Administrative Order No. 18.

Noong 2010, ipinatupad na ito ni President Benigno Aquino Jr. Noong 1973, ipinagbawal din ito ni President Marcos Sr. nang lagdaan ang Presidential Decree 96. Sa PD 96, ang maaari lamang gumamit ng sirens, bell, horns at katulad na gadgets ay ang AFP, PNP at NBI, fire trucks at hospital ambulances.

Makaraang ihayag ng Presidente ang kautusan, agad nagpakitang gilas ang Highway Patrol Group (HPG) at nakalambat sila ng 1,707 sirens, blinkers at mga katulad na signaling or flashing devices. Ayon sa HPG, karamihan sa nahuli nila ay mga sasakyan ng pulis at iba pang taong gobyerno. Nangunguna ang Calabarzon, Davao at Caraga sa mga lugar na maraming nakumpiskang accessories at gadgets sa mga sasakyan.

Sana tuluy-tuloy na ang pagdakma sa mga sasak­yang may blinkers, sirens at iba pang illegal attachment. Madalas na nangyayari na masigla lang sa simula ang kampanya ng pamahalaan laban sa mga sasakyang may illegal attachment at pagkaraan ng dalawang linggo, balik na naman sa masamang gawi. Nawala na ang sigla sa paghuli sa mga may sirens, blinkers at pati na rin ang mga nagwa-wangwang. Balik na naman sa kalye ang mga mayayabang at abusado.

Ipakita ng HPG ang ngipin at walang humpay na hulihin ang mga abusado sa kalye. Huwag mag-ningas kugon na sa simula lamang ipinatutupad ang batas at kapag ­naging malamig na ang isyu ay wala nang ginagawa.

Paigtingin din naman ng Metro Manila Development Authority (MMDA) ang paghihigpit sa mga abusadong dumadaan sa bus lanes. Kahit na alam na bawal sa bus lanes, doon pa rin dumaraan. Karamihan sa mga lumalabag ay mga opisyal ng gobyerno at mga taong inihalal ng taumbayan na ang plaka ng sasakyan ay numero “7” at “8”. Sabi ni MMDA ang mga maaari lamang gumamit ng bus lane ay ang convoys ng Presidente, Bise Presidente, Speaker of the House, Senate President, at Supreme Court Chief Justice.

Ang sinumang lalabag ay pagmumultahin ng P5,000 sa unang offense; P10,000, at isang buwan na suspension ng driver’s license sa second offense; P20,000 at suspension ng driver’s license sa loob ng isang taon sa third offense, at P30,000 at pagbawi ng driver’s license sa mga susunod na paglabag.

Higpit ngayon, luwag bukas. Ganito ang nangyayari ngayon. Ningas kugon sa pagpapatupad ng batas.