Gahi, Soliva nanamilit sa UV Lancers nga mapasalamaton

CEBU, Philippines — Dili man tuod kadto ang gusto nila nga katapusan sa tagsa-tagsa nila ka mga karera sa kolehiyo, apan sila si All-Star guard Sheldon Gahi ug forward Monic Soliva mapasigarbuhon gihapon nga nahimo silang kabahin sa University of the Visayas (UV) Green Lancers sa Cebu Schools Athletic Foundation, Inc. (CESAFI).

Sila si Gahi ug Soliva, mga lig-ong haligi sa pagsakmit sa UV og grandslam title gikan niadtong 2016 ngadto sa 2018, pakyas paghatod og laing kampiyonato sa Lancers sa katapusan nilang tuig sa pagduwa human sila tukba sa  Southwestern University (SWU)-Phinma Cobras niadtong Biyernes sa gabii didto sa Cebu Coliseum.

Ang Lancers mibangon human malubong og 18 puntos sa second half, apan sa kinauwahian nahutdan og bala dayon na ngadto sa pagtilaw og 60-64 nga kaparotan sa mga kamot sa Cobras nga mibira sa labing una nilang korona sa CESAFI sud sa lima ka tuig.

Taliwala sa kapakyasan, sila si Gahi ug Soliva parehong nanamilit sa UV Lancers uban ang mapasalamaton nga kasingkasing.

"To all UV community and supporters, sorry to disappoint you guys," emosyonal pang tagik ni Gahi sa iyang Facecook post. "But still I want to thank all of you. To Samsam Gullas, thank you so much kuya boss for all the support sa team. Thank you so much coach sa tanan. 5 Finals Appearances!"

Susama sab ang gibati ni Soliva sa kinailawmang bahin sa iyang dughan.

"Thank you UV for the opportunity to wear the white and green and to represent our school. It has been a wonderful experience,"  sumala pa ni Soliva.

Sila si Gahi ug Soliva duha sa upat ka mga graduating UV players. Ang laing duha mao sila si Gileant Delator ug Michael Maestre.

Sa iyang bahin, si UV coach Gary Cortes nangayo og dispensa sa ilang fans ug tibuok komunidad sa UV gumikan kay napakyas sila pag-inat sa ilang paghari sa liga ngadto sa upat ka tuig.

"To the UV community, Lancers fans, thank you so much for all your support. We are sorry to disappoint you all," matud pa ni Cortes nga nakasud sa finals sud sa lima ka sunod-sunod nga higayon sukad siya nahimong coach sa UV niadtong 2015.

Nahagba man tuod sila karon, apan si UV Basketball team manager Samsam Gullas dunay usa ka solidong linya kabahin kon unsa'y ugma nga nagpaabot sa Lancers.

"We will come back stronger," saad pa ni Gullas.