Garbage truck sumalpok sa bahay; driver patay

MANILA, Philippines — Namatay noon din ang isang truck driver nang sumalpok sa isang bahay at tricycle matapos mawalan ng preno ang kanyang minamanehong dump truck naganap sa Barangay Darangan, Binangonan, Rizal, kamakalawa ng hapon.

Kinilala ang nasawing driver ng Isuzu dump truck na si Cholan Binala y Fernandez, 43, residente ng Binangonan, Rizal.

Nawasak naman ang Kawasaki tricycle na pag-aari ni Jose Evillio Merino y Roque, 59, at ang bahay na pag-aari ni Marlon Aragon y Dela Cruz, 41.

Sa inisyal na imbestigasyon ng pulisya, dakong 4:30 ng hapon ay bumabagtas ang dump truck na minamaneho ni Fernandez sa Mabuhay Homes, pababa ng Quarry, Brgy. Darangan, Binangonan, Rizal, nang bigla itong rumagasa.

Nahagip nito ang nakaparadang traysikel sa tabi ng kalsada bago ito tuluyang bumangga sa bahay, na kanyang ikinasawi.

Ipinalalagay ng mga otoridad na nawalan ng preno ang dump truck kaya bigla na lamang itong rumagasa, habang hindi pa matukoy kung magkano ang halaga ng pinsala.