Lolong welder niratrat ng 2 ‘kustomer’, patay!

MANILA, Philippines — Patay ang isang lolong welder nang pagbabarilin ng dalawang lalaking nagpanggap na kustomer sa Rodriguez, Rizal kamakalawa.

Ang biktimang si Oscar Mejarito, 64 anyos, ng Sitio Licao-licao, Brgy. Macabud, Rodriguez ay binawian ng buhay bunsod ng tinamong mga tama ng bala sa iba’t ibang bahagi ng kanyang katawan.

Nakatakas naman ang mga ‘di kilalang suspek, bitbit ang baril na ginamit sa krimen.

Batay sa ulat ng Rodriguez Municipal Police Station, dakong alas-12:30 ng hapon nang maganap ang krimen sa boundary ng San Jose Del Monte City, Bulacan, at Sitio Licao-licao, Brgy. Macabud, Rodriguez, Rizal.

Nauna rito, nagtungo umano ang mga suspek sa bahay ng biktima at nagkunwaring mga kustomer na manghihingi ng “job quotation” para sa welding.

Gayunman, nang lumabas ng bahay ang biktima ay bigla na lang umanong nagbunot ng baril ang mga suspek at pinaputukan siya.

Nang matiyak na napuruhan ang target, mabilis na tumakas ang mga suspek.

Naisugod naman ang biktima sa pagamutan ngunit idineklara ng mga manggagamot na dead-on arrival.