Bahay ni-raid: Negosyante timbog sa sandamakmak na armas, bala
CAVITE, Philippines — Arestado ang isang negosyante matapos na makumpiska sa kanyang pag-iingat ang napakaraming uri ng matataas na kalibre ng baril, mga bala at iba pang kagamitan sa ikinasang raid ng mga awtoridad sa kanyang bahay kamakalawa sa Brgy. Bagbag, Tanauan City, Batangas.
Patung-patong na kaso ang kakaharapin ng negosyanteng kinilala lang sa alyas “Jose”, nasa hustong gulang.
Sa ulat ng pulisya, alas-5:20 ng madaling araw sinimulan ng pinagsanib na puwersa ng Police Intelligence Unit (PIU) ng Batangas Police Provincial Police Office (PPO), SWAT-BPPO, Regional Mobile Force Battalion (RMFB) 403rd at Tanauan Police, ang kanilang operasyon laban sa suspek.
Bitbit ng grupo ang isang search warrant sa paglabag sa RA 10591 na inisyu ni Judge Judge Nevic C. Adolfo ng Regional Trial Court (RTC) Branch 83, Tanauan City, Batangas, sinalakay ang bahay ng suspek at dito nadatnan ang mga nakaimbak na napakaraming armas at bala sanhi upang siya ay arestuhin.
Nasa kustodya na ng pulisya ang suspek habang inihahanda ang paghahain sa kanya ng mga kasong criminal.
- Latest
