Lalaki galing simbahan pinalakol sa ulo, patay sa Pampanga

MANILA, Philippines — Patay ang isang lalaking nagdasal sa simbahan matapos palakulin sa ulo ng kanyang kasama nitong Linggo ng gabi sa Apalit, Pampanga.

Sa ulat ng ABS-CBN ngayong Huwebes, sinabi na nanggaling sa pagsamba ang biktima bago ang krimen. Wika ng Apalit police, napag-alamang nagkubli ng palakol sa bag ang 56-anyos na suspek at bigla na lang pinagpapalakol ang biktima sa ulo.

"Itong isang miyembro nila allegedly during the investigation, ay may bumubulong daw sa kanya, na patayin niya yung isang kamiyembro," ani PLt. Col Michael Riego.

"Ang problema, itong suspek natin, nakapasok siya sa church na may dala-dalang palakol na nakapasok doon, nakasilid doon sa bag, sa badminton bag, kaya hindi gaanong nahalata."

Naisugod pa sa Pampanga Premier Hospital ang biktima ngunit idineklara nang nasawi ng attending physician.

Hindi na nagawang makapuslit ang suspek matapos harangan ng mga kasamahan sa simbahan.

Sinampahan ng kasong murder ang suspek kaugnay ng krimen, maliban sa paglabag ng Omnibus Election Code dahil sa pagdadala ng patalim at kasalukuyang nakapiit sa Apalit municipal police station. — James Relativo