Sekyu ng mall nagsoli ng pera at cellphone

LUCENA CITY, Philippines — Umaani ngayon ng papuri ang isang security guard ng isang malaking mall dahil sa kabila ng nararanasang kahirapan dulot ng pandemya, hindi siya nagdalawang-isip na isoli ang napulot niyang wallet na naglalaman ng pera at mamahaling cellphone sa Brgy. Ibabang Dupay kahapon.

Ayon kay Lilibeth Azores, PR consultant ng SM City Lucena, habang gumagampan ng kanyang tungkulin si Security Guard Carlo Bolito ng Stanch Security Agency sa Open Parking C ng nasabing mall ay napulot nito ang isang wallet na may lamang pera na nagkakahalaga ng P28,073.00, isang Iphone8, mga IDs at iba pang mahahalagang dokumento.

Ang napulot na pera at cellular phone ni Bolito­ ay agad niyang dinala sa Community Relation Service­ (CRS) Office ng nasabing mall para ma­tukoy ang tunay na nagmamay-ari nito.

Sa isinagawang beripikasyon, nakilala at na­ibalik ang naturang wallet at cellphone sa nagmamay-ari nito na nakilalang si Noeh Ramos, 25-anyos at taga- Brgy. Mayao Parada, Lucena City.