Mag-asawang tulak ng shabu timbog sa Cotabato

MANILA, Philippines – Nasakote na ng mga awtoridad kagabi ang mag-asawang matagal nang pinaghahahanap dahil sa large-scale drug trafficking sa North Cotabato.

Kinilala ni Inspector Realan Mamon, hepe ng Magpet municipal police, ang mga suspek na sina Noel Flordeliza Cabarillos at Janet Latimbang Cabarillos.

Hindi na lumaban ang asawa matapos mapaligiran ng mga awtoridad ang kanilang bahay, dagdag ni Mamon.

Inaresto ang mga suspek sa bisa ng search warrant na inilabas ni Judge Arvin Balagot ng Regional Trial Court Branch 17 sa Kidapawan City.

Nabawi mula sa mag-asawa ang 48-pakete ng shabu.

“This couple is a big fish. The long hand of law finally reached and caught them with the help of barangay leaders,” pahayag ni Mamon.

Nahaharap ang mga suspek sa kasong paglabag sa Philippine Dangerous Drugs Act.