3 rebelde sumuko sa militar sa North Cotabato

MANILA, Philippines - Nagbalik-loob sa pamahalaaan ang tatlong miyembro ng New People's Army (NPA) na nakabase sa lalawigan ng North Cotabato.

Kinilala ni Lt. Col. Nilo Vinluan, kumander ng 57th Infantry Battalion, ang mga sumukong rebelde na sina Jimmy Ampoy, Larry Maasan Bayawan at Danny Tambonan.

Ayon kay Vinluan, nagsisisi umano ang tatlong dating rebelde sa pagsama sa kilusan dahil nalaman nilang parang operasyon ng sindikato ang ginagawa nila.

Sinabi umano ng tatlong sumuko na sa bawat pagsalakay na gagawin ng kanilang grupo ay may natatanggap silang bayad.

Hindi na rin umano masikmura ng mga sumukong rebelde ang pangongotong ng kanilang grupo sa mahihirap na magsasaka sa lalawigan.

Sinabi ni Vinluan na bibigyan nila ng kaukulang seguridad ang tatlong sumukong rebelde dahil sigurado umanong babalikan sila ng mga dati nilang kasama sa kilusan.