Kilabot na tulak sa Mindoro timbog

MANILA, Philippines – Tiklo sa buy-bust operation ang isang hinihinalang pinuno ng isang drug group sa Oriental Mindoro, ayon sa Philippine Drug Enforcement Agency (PDEA) ngayong Huwebes.

Nakilala ang suspek na si Raul Barcelona, 48, na residente ng Barangay Lumangbayan sa lungsod ng Calapan.

Nakorner si Barcelona matapos bentahan ng dalawang pekete ng shabu ang isang undercover agent sa Barangay Lumangbayan bandang alas-10 ng umaga nitong kamakalawa.

Nitong Marso lamang din ay isang tauhan ni Barcelona ang nasakote na nakilalang si Vincent Corrabels, 27.

Nahaharap sa kasong paglabag sa Section 5 (Sale of Dangerous Drugs), Article II ng Republic Act 9165, o ang Comprehensive Dangerous Drugs Act of 2002.

Nasa kustodiya na ng PDEA Regional Office 4-B jail facility si Barcelona.