7-anyos bata pisak sa trak

CAVITE, Philippines – Napisak ang katawan at namatay ang 7-anyos na batang lalaki matapos masagasaan ng kotse at trak sa kahabaan  ng Molino Boulevard sa Barangay Niog, Bacoor City, Cavite kahapon ng umaga. Kinilala ni PO1 Mark Lester Macapagal ang biktima na si Redgie Colona ng Barangay Niog 3 sa nasabing lungsod. Samantala, naaresto naman ang driver ng trak (ZGN-455) na si Jimmy Esto, 34, ng Norzagaray, Bulacan. Nakatakas naman ang driver ng Toyota Innova  na unang nakasagasa sa bata. Lumilitaw na biglang bumitaw sa pagkakapit sa kamay ng nanay ang biktima habang naglalakad sa gilid ng Molino Boulevard. Dito na nagtatakbo ang bata kung saan hindi na naiwasan ng Innova kung saan tumilapon at nasagasaan naman ng trak ni Esto.