Nawawalang rookie cop, natagpuang bangkay

CAVITE, Philippines – Nagwakas na ang misteryo sa pagkawala ng isang bagitong pulis matapos itong matagpuang naagnas na bangkay na ibinalot pa sa carpet saka tinabunan ng damo sa isang tubuhan sa Paliparan III, Dasmariñas City, Cavite kamakalawa ng hapon.

Kinilala ang biktima na si PO1 Jay Descartin de los Santos, 32 anyos, binata, nakatalaga sa General Mariano Alvarez (GMA) Police Station, residente ng Summerwind Ville IV, Brgy Burol ng lungsod.

Ayon kay Dasmariñas City Police Director P/Sr. Supt Ulysses Cruz, bandang alas 2:10 ng hapon ng matagpuan sa isang tubuhan ang bangkay ng biktima na halos hindi na makilala sanhi ng naagnas na ito at masangsang na ang amoy.

Ang bangkay ay nakabalot pa sa isang carpet na bahagyang natatabunan ng damo at hinihinalang tinorture muna ng hindi pa nakilalang mga salarin bago tuluyang pinaslang.

Sa pahayag ng pamilya ng biktima may dalawang linggo ng nawawala ang nasabing bagitong pulis na positibong kinilala ng kaniyang ama na si Juanito de los Santos .

Narekober naman ng nagrespondeng Scene of the Crime Operatives (SOCO) team ng pulisya ang cartridge ng cal 45 pistol.