Grade 1 pupil pisak sa trak

TUGUEGARAO CITY, Philippines - Pisak ang isang 7-anyos na grade one pupil matapos itong sagasaan ng 10-wheeler truck sa kahabaan ng highway sa Barangay Arellano sa bayan ng Quezon, Isabela kamakalawa.

Kinilala ng pulisya ang nasawing si Joey Valdez ng nasabing barangay.

Nabatid na bigla na lamang tumawid ang biktima na kung saan hindi alintana ang rumaragasang trak na minamaneho ni Salvador Pagtud, 28, tubong Barangay Pinagan Lucog sa Tabuk City, Kalinga.

Hindi na naiwasan ng driver ang biktimang pumailalim at sinasabing nakaladkad pa ng ilang metro.

Sinaklolohan naman ng ilang residente at isinugod sa ospital subalit idinekla­rang patay ang biktima.

Samantalang sumuko naman sa pulisya ang driver na nahaharap sa kaukulang kasong kriminal.