Navy personnel itinumba

MANILA, Philippines - Napaslang ang isang Navy personnel makaraang ratratin ng tatlong di-kilalang armadong kalalakihan sa kahabaan ng highway sa Barangay Bobonot sa bayan ng Dasol, Pangasinan noong Biyernes ng hapon. Kinilala ang biktima na si Petty Officer 2 Victor Balanon, may-asawa, nakabase sa Zambales at naninirahan sa Barangay Catuni sa bayan ng Bolinao, Pangasinan. Sa ulat ni P/Senior Supt. Mariano Luis Verzosa, officer-in-charge sa Pangasinan PNP Office, lulan ng sasakyan ang biktima kasama ang isang  babaeng miyembro rin ng Philippine Navy nang harangan at pagbabarilin pagsapit sa kumpol ng mga kawayan. Hindi naman sinaktan ang kasama nitong Navy personnel na babae na siyang nag-report sa mga awtoridad. Nabatid na ang biktima ay pauwi sana mula sa kanilang base sa Zambales para sa weekend leave nang makasalubong si kamatayan.