Ama sinalo ang saksak sa anak

BULACAN, Philippines - Napaaga ang salubong ni kamatayan sa 54-anyos na ama matapos na saluhin nito ang saksak para sa kanyang anak laban sa magkapatid na lalaki sa Barangay Burol 1 sa bayan ng Balagtas, Bulacan kamakalawa ng gabi. Hindi na umabot ng buhay sa ospital si Jose Alcantara, kolektor ng basura at nakatira sa Brgy. Burol 1st habang nasakote naman ang isa sa suspek na si Ronnie Lejencio 38. Tinutugis naman ang kapatid nitong si Jerry Lejencio. Ayon kay PO1 Roman Katipunan, nilusob ng magkapatid ang bahay ng mag-ama kung saan kinompronta ang batang Alcantara sa hindi nabatid na dahilan. Tinangkang payapain ng biktima ang magkapatid na tangkang sasaksakin ang kanyang anak. Dito na iniharang ng biktima ang kanyang katawan kaya siya ang nasaksak ng mag-utol.