5-anyos pisak sa bus

MANILA, Philippines - Napisak ang katawan ng 5-anyos na batang babae matapos magulungan at makaladkad ng pampasaherong bus sa highway ng Barangay El Pardo sa bayan ng Boljoon, Cebu kamakalawa . Sa police report na nakarating sa Camp Crame, lumilitaw na kabababa lamang sa traysikel ng biktimang si Jeven Andrie Acedo kasama ang kanyang 60-anyos na lolang si Maria Elvie Sestosa matapos itong sunduin sa day care center. Gayon pa man, bigla na lamang umanong nagtatakbo ang biktima pagbaba sa traysikel na tumawid sa highway. Nabigo naman ang matanda na pigilan ang kanyang apo kung saan tuluy-tuloy namang nahagip ng Sunray Bus Liner ni Nonito Talasan, 47 na tinangkang mag-overtake sa trike na sinasakyan ng maglola. Sumuko naman sa himpilan ng pulisya ang driver kung saan nangako naman ang pangasiwaan ng bus company na sasagutin ang burol at pagpapalibing sa bata.