4 dedo sa pananambang

Manila, Philippines -  Apat-katao ang iniulat na nasawi habang isa ang nasugatan makaraang tambangan ng mga armadong kalalakihan sa Barangay Guiniculalay sa bayan ng Dinas, Zamboanga del Sur kamakalawa ng gabi. Kinilala ang mga napaslang na sina Eliodoro Doong, Meraljun Doong, Danilo Zamora, at si Ani Minoc habang sugatan naman si Rodel Doong. Sa ulat ni P/Chief Supt. Napoleon Estilles na nakarating sa Camp Crame, iniimbestigahan na ang posibilidad na sigalot sa lupain ang motibo ng pamamaslang kung saan bumuo na rin ng Special Investigating Task Group Dinas upang imbestigahan ang insidente at bigyang hustisya ang sinapit ng mga biktima. Naglatag na rin ng checkpoint at magkatuwang na tinutugis ng mga operatiba ng pulisya at ng Army’s 53rd Infantry Battalion (IB) ang gunmen.